കോട്ടയം : മണര്കാട് സ്വദേശി അര്ച്ചനയെ വീട്ടില് മരിച്ച നിലയില് കണ്ടെത്തിയ കേസില് ഭര്ത്താവ് ബിനു അറസ്റ്റില്. സ്ത്രീധന പീഡനമടക്കമുള്ള വകുപ്പുകള് ചേര്ത്താണ് ബിനുവിനെ അറസ്റ്റ് ചെയ്തത്. സ്ത്രീധനത്തിന്റെ പേരില് ഭര്ത്താവ് ബിനു മകളെ പീഡിപ്പിച്ചിരുന്നുവെന്നാരോപിച്ച് അര്ച്ചനയുടെ മാതാപിതാക്കളാണ് ആദ്യം പരാതിയുമായെത്തിയത്. കഴിഞ്ഞ ഏപ്രില് മൂന്നിനാണ് ഭര്ത്താവിന്റെ വീട്ടില് അര്ച്ചനയെ തൂങ്ങിമരിച്ച നിലയില് കണ്ടെത്തിയത്.
സ്വത്തും സ്വര്ണവും വേണ്ടെന്ന് പറഞ്ഞാണ് ബിനു കിടങ്ങൂര് സ്വദേശിനിയായ അര്ച്ചനയെ വിവാഹം കഴിച്ചത്. രണ്ടര വര്ഷം മുമ്പായിരുന്നു ഓട്ടോ കണ്സള്ട്ടന്റായ ബിനുവും അര്ച്ചനയുമായുള്ള വിവാഹം. പിന്നീടാണ് എല്ലാം മാറിമറിഞ്ഞത്. ബിനുവിന് വ്യാപാര സ്ഥാപനം വിപുലപ്പെടുത്താന് 25 ലക്ഷം രൂപ ആവശ്യപ്പെട്ടായിരുന്നു പീഡനം. ഈ ആവശ്യം ഉന്നയിച്ച് ബിനുവും വീട്ടുകാരും പണമാവശ്യപ്പെട്ട് അര്ച്ചനയെ പീഡിപ്പിച്ചെന്ന് പിതാവ് രാജു പറയുന്നു.
സ്ഥലം വിറ്റ് പണം നല്കാന് വീട്ടുകാര് തീരുമാനിച്ചെങ്കിലും കോവിഡ് കാലം വിലങ്ങുതടിയായി. ഇതോടെ വൈരാഗ്യം കൂടി. ബിനു, അര്ച്ചനയെ ഉപദ്രവിക്കുന്നത് പതിവായി. അര്ച്ചന വീട്ടിലെത്തിയാലും കുടുംബത്തോട് സംസാരിക്കാന് സമ്മതിക്കില്ല. തങ്ങളുടെ മുന്നില് വച്ചും അര്ച്ചനയെ ബിനു മര്ദ്ദിച്ചിട്ടുണ്ടെന്നും പിതാവ് പറയുന്നു. അര്ച്ചന മരിക്കുന്നത് ദിവസങ്ങള്ക്ക് മുമ്പ് 20,000 രൂപ കുടുംബം ബിനുവിന് കൈമാറിയിരുന്നു. നിലവില് അര്ച്ചനയുടെ വീട്ടുകാരുടെ പരാതിയുടെ അടിസ്ഥാനത്തിലാണ് അന്വേഷണം നടത്തി പോലീസ് അറസ്റ്റ് രേഖപ്പെടുത്തിയത്.
