ചെങ്ങന്നൂര്: കുടുംബ വഴക്കിനെത്തുടര്ന്ന് ഭാര്യയെ വെട്ടി പരിക്കേല്പ്പിച്ച ശേഷം ഭര്ത്താവ് വീടിനുള്ളില് ആത്മഹത്യ ചെയ്ത നിലയില്. പുലിയൂര് പേരിശ്ശേരി ഗ്രേസ് കോട്ടേജില് ജോമോന് (40) ആണ് തൂങ്ങി മരിച്ചത്. തിങ്കളാഴ്ച രാത്രി 11.30 ഓടെയാണ് സംഭവം.
ജോമോന് മദ്യപിച്ച് ഭാര്യ ജോമോളുമായി വഴക്കുണ്ടാക്കുകയും തുടര്ന്ന് വെട്ടുകത്തി ഉപയോഗിച്ച് ഭാര്യയെ കഴുത്തിനും പുറത്തും കൈയ്ക്കും വെട്ടിപ്പരിക്കേല്പ്പിക്കുകയായിരുന്നു. വെട്ടുകൊണ്ട ജോമോള് വീടിന്റെ ചുറ്റുമതില് ചാടിക്കടന്ന് അയല്പക്കത്തെ വീട്ടില് ഓടിക്കയറി. അയല്ക്കാര് വിവരമറിയിച്ചതിനെ തുടര്ന്ന് പോലീസെത്തി ജോമോളെ ചെങ്ങന്നൂരിലെ സ്വകാര്യ ആശുപത്രിയില് എത്തിച്ചു. നില ഗുരുതരമായതിനാല് അവിടെ നിന്നും തിരുവല്ലയിലെ സ്വകാര്യ മെഡിക്കല് കോളജ് ആശുപത്രിയിലേക്ക് മാറ്റി.
ജോമോനെ അന്വേഷിച്ച് വീട് പരിശോധിച്ച പോലീസ് ഇയാള് വീട്ടിനുള്ളിലെ സീലിങ് ഫാനില് തൂങ്ങിയ നിലയില് കണ്ടെത്തുകയായിരുന്നു. നടപടികള്ക്കു ശേഷം മൃതദേഹം മാലക്കരയിലെ ആശുപത്രിയില് കൊവിഡ് പരിശോധനക്ക് വിധേയമാക്കിയശേഷം ചെങ്ങന്നൂരിലെ സ്വകാര്യ ആശുപത്രി മോര്ച്ചറിയിലേക്ക് മാറ്റി.
