ന്യൂഡല്‍ഹി : സുപ്രീം കോടതി പരിസരത്ത് യുവതിയും യുവാവും തീകൊളുത്തി ആത്മഹത്യയ്ക്ക് ശ്രമിച്ചു. ഡി ഗേറ്റിന്റെ സമീപത്ത് ഇന്ന് ഉച്ചയ്ക്ക് 12.20 ഓടെയാണ് സംഭവം ഉണ്ടായത്. മതിയായ രേഖകള്‍ കൈവശമില്ലാത്തതിനാൽ സുപ്രീം കോടതി പരിസരത്തേയ്ക്ക് പ്രവേശിക്കാനായി എത്തിയ യുവതിയെയും യുവാവിനെയും കവാടത്തിന് സമീപം തടഞ്ഞിരുന്നു. ഇതിന് പിന്നാലെയാണ് ഇരുവരും സ്വയം തീകൊളുത്തി ആത്മഹത്യയ്ക്ക് ശ്രമിച്ചത്.
തീകത്തിയതിന് പിന്നാലെ സമീപത്തുണ്ടായിരുന്നവര്‍ ഓടിയെത്തി ഇരുവരെയും രക്ഷിക്കാന്‍ ശ്രമിച്ചു. പോലീസ് എത്തിയാണ് തീയണച്ചത്. തുടർന്ന് പൊള്ളലേറ്റ ഇരുവരെയും ആശുപത്രിയിലേയ്ക്ക് മാറ്റിയിരിക്കുകയായിരുന്നു. പോലീസ് വാനിലാണ് യുവതിയെയും യുവാവിനെയും ആശുപത്രിയിലെത്തിച്ചത്. ഇരുവരെയും ഇതുവരെ തിരിച്ചറിയാന്‍ സാധിച്ചിട്ടില്ലെന്നാണ് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്.
