കോട്ടയം : മണിമലയില് വെട്ടേറ്റ എസ്ഐ – ഇ ജി വിദ്യാധരനെ മന്ത്രി വി.എന് വാസവന് സന്ദര്ശിച്ചു. ചികിത്സാച്ചെലവ് പൂര്ണമായും സര്ക്കാര് വഹിക്കുമെന്ന് മന്ത്രി പറഞ്ഞു. പ്രതിയെ അറസ്റ്റ് ചെയ്യുന്നതിനിടെയാണ് എസ്ഐയ്ക്ക് വെട്ടേറ്റത്.
വധശ്രമ കേസിലെ പ്രതി അജിന്റെ പിതാവ് പ്രസാദാണ് എസ്.ഐ വിദ്യാധരനെ വെട്ടിയത്. പ്രതികളായ അജിനേയും പ്രസാദിനേയും പോലീസ് അറസ്റ്റ് ചെയ്തു. വധശ്രമം, പോലീസിന്റെ കൃത്യനിര്വഹണം തടസ്സപ്പെടുത്തല് തുടങ്ങിയ കേസുകളാണ് പ്രസാദിനെതിരെ ചുമത്തിയത്.
മണിമല പോലീസ് സ്റ്റേഷന് പരിധിയിലെ വെള്ളാവൂര് ചുവട്ടടിപ്പാറയിലാണ് സംഭവം. അയല്വാസിയെ കൊലപ്പെടുത്താന് ശ്രമിച്ച കേസിലെ പ്രതി അജിന് വീട്ടിലുണ്ടെന്ന വിവരത്തെ തുടര്ന്ന് രാവിലെ ആറരയോടെയാണ് പോലീസ് സംഘം വീട്ടില് എത്തിയത്. പ്രതിയെ പിടികൂടുന്നതിനിടെ പിതാവ് പ്രസാദ് ഗ്രേഡ് എസ്ഐ -ഇ ജി വിദ്യാധരനെ വെട്ടുകയായിരുന്നു. മുഖത്ത് പരുക്കേറ്റ വിദ്യാധരനെ കോട്ടയം മെഡിക്കല് കോളജില് പ്രവേശിപ്പിച്ചു.
