മണിമല: ചിറക്കടവില് റബര് തോട്ടത്തില് ഒളിച്ചിരുന്ന അന്യ സംസ്ഥാന തൊഴിലാളിയെ നാട്ടുകാരുടെ സഹായത്തോടെ മണിമല പോലീസ് പിടികൂടി. രാവിലെ ടാപ്പിംഗിന് പോയ തൊഴിലാളിയാണ് റബര് തോട്ടത്തില് ഒളിച്ചിരിക്കുന്ന ഇയാളെ കണ്ടത്. നാട്ടുകാരെ വിളിച്ചു കൂടിയതോടെ ഇയാള് ഓടിരക്ഷപെടാന് ശ്രമിച്ചു. സമീപത്തുള്ള ഒരു വീട്ടിലേക്കാണ് ഇയാള് ഓടിക്കയറിയത്. ഈ സമയം വീട്ടുകാര് വീടിനു വെളിയിലായിരുന്നു. ഓടിക്കൂടിയ നാട്ടുകാര് വീട് വെളിയില് നിന്നും പൂട്ടി പോലീസില് വിവരമറിയിക്കുകയായായിരുന്നു.
മണിമല പോലീസ് സ്ഥലത്തെത്തി വീടിനുള്ളില് നിന്നും ഇയാളെ പിടികൂടുകയായിരുന്നു. വീടിനുള്ളില് കയറിയ ഇയാള് സ്വയം മുറിവേല്പ്പിച്ചിരുന്നു. വിലങ്ങുവെച്ച് കൊണ്ടുപോകവേ വാഹനത്തിന്റെ ചില്ല് ഇടിച്ചു തകര്ക്കാന് ഇയാള് ശ്രമിച്ചു. കാഞ്ഞിരപ്പള്ളി താലൂക്ക് ആശുപത്രിയില് പരിശോധനയ്ക്കായി എത്തിച്ച ഇയാള് നേഴ്സിന്റെ തലയ്ക്കിടിച്ചു രക്ഷപെടാനും ശ്രമിച്ചു. മോഷണത്തിനായി എത്തിയതാണ് ഇയാളെന്ന് നാട്ടുകാര് പറയുന്നു.
