കൊല്ലം: വിവാഹ തട്ടിപ്പ് കേസില് പഞ്ചായത്ത് വകുപ്പിലെ എല്.ഡി ക്ലര്ക്ക് പിടിയില്. ആദ്യ വിവാഹം മറച്ചുവച്ച് മറ്റൊരു പെണ്കുട്ടിയെ വിവാഹം കഴിച്ച് തട്ടിപ്പ് നടത്തിയ സംഭവത്തില് കൊല്ലം കൊട്ടാരക്കര മാങ്കോട് മതിരതൂറ്റിക്കല് ശ്രീകുലം വീട്ടില് ശ്രീനാഥ് ആണ് അറസ്റ്റിലായത്. തിരുവനന്തപുരം റൂറല് ക്രൈംബ്രാഞ്ച് പോലീസാണ് പ്രതിയെ പിടികൂടിയത്.
2021 ഫെബ്രുവരിയിലാണ് ഇയാളുടെ ആദ്യ വിവാഹം നടന്നത്. ഈ വിവാഹബന്ധം നിലനില്ക്കവെ ചീരാണിക്കര സ്വദേശിനിയായ മറ്റൊരു യുവതിയെ കല്യാണം കഴിച്ചു. ഇതില് 70 പവന് സ്വര്ണാഭരണങ്ങളും 50 സെന്റ് വസ്തുവും മാരുതി സ്വിഫ്റ്റ് കാറും സ്ത്രീധനമായി കൈപ്പറ്റുകയും ചെയ്തു. ഇതിനിടെ, ഇയാളുടെ ആദ്യ വിവാഹത്തെ കുറിച്ച് രണ്ടാം ഭാര്യ അറിയുകയും വട്ടപ്പാറ പോലീസ് സ്റ്റേഷനില് പരാതി നല്കുകയും ചെയ്തു. ഇതിന്റെ അടിസ്ഥാനത്തില് നടത്തിയ അന്വേഷണത്തിലാണ് പ്രതിയെ അറസ്റ്റ് ചെയ്തത്.