ആലപ്പുഴ : കോവിഡ് വ്യാപനത്തിന്റെ രണ്ടാം വരവിനെ പ്രതിരോധിക്കാൻ ജാഗ്രതാ സമിതികളുടെ പ്രവർത്തനങ്ങൾ ഊർജിതമാക്കാൻ ആലപ്പുഴ ജില്ലയിലെ ഗ്രാമപഞ്ചായത്തുകളും നഗരസഭകളും നടപടികൾ ആരംഭിച്ചു. തദ്ദേശ സ്ഥാപനങ്ങളിൽ പഞ്ചായത്ത് /നഗരസഭാ തല ജാഗ്രതാ സമിതികൾ ഇന്നലെ തന്നെ അടിയന്തിര യോഗം ചേർന്നു.
കോവിഡ് വ്യാപനം കഴിഞ്ഞ ദിവസങ്ങളിൽ കൂടുതലായി റിപ്പോർട്ട് ചെയ്ത സാഹചര്യത്തിൽ കളക്ടറുടെ നിർദേശപ്രകാരമാണു യോഗം ചേര്ന്നത്. പഞ്ചായത്തുകളിലും നഗരസഭകളിലും നിലവിലെ കോവിഡ് പ്രതിരോധ പ്രവർത്തനങ്ങൾ വിലയിരുത്തുന്നതിനായി വാർഡ് തല ജാഗ്രതാ സമിതികൾ വരും ദിവസങ്ങളിൽ ചേരും. വാക്സിനേഷൻ വേഗത്തിലാക്കാനും പ്രാദേശിക തലത്തിൽ ബോധവൽക്കരണം ശക്തമാക്കാനും നടപടി സ്വീകരിക്കും. മൈക്ക് അനൗൺസ്മെന്റുകൾ നടത്തും.
കോവിഡ് വാക്സിനേഷൻ പ്രവർത്തനങ്ങൾ ശക്തിപ്പെടുത്തുന്നതിനായി പ്രാദേശികമായി കൂടുതൽ ക്യാമ്പുകൾ സംഘടിപ്പിക്കുന്നതിന്റെ സാധ്യതകളും വിവിധ തദ്ദേശ സ്ഥാപനങ്ങൾ ചർച്ച ചെയ്തു. വിവാഹം, മരണാനന്തര ചടങ്ങുകൾ നടക്കുന്ന സ്ഥലങ്ങളിൽ സെക്ടറൽ മജിസ്ട്രേറ്റിന്റെ നേതൃത്വത്തിൽ പരിശോധനകൾ കർശനമാക്കുകയും നിർദേശങ്ങൾ ലംഘിച്ചാൽ ഉടനടി പിഴ ചുമത്തുകയും ചെയ്യാനുള്ള നടപടികൾ തദ്ദേശ സ്ഥാപനങ്ങൾ സ്വീകരിക്കും.
