മലപ്പുറം : പോക്സോ കോടതി പിടികിട്ടാപ്പുള്ളിയായി പ്രഖ്യാപിച്ച പ്രതിയെ വയനാട് മാനന്തവാടി മുരുക്കിൻ തേരി ട്രൈബൽ കോളനിയിൽനിന്ന് പിടികൂടി. കൽപകഞ്ചേരി പോലീസ് സ്റ്റേഷനിൽ രജിസ്റ്റർചെയ്ത പോക്സോ കേസിൽ തിരൂർ സ്പെഷ്യൽ ഫസ്റ്റ് ട്രാക്ക് കോടതി പിടികിട്ടാപ്പുള്ളിയായി പ്രഖ്യാപിച്ച കാടാമ്പുഴ മരുതൻചിറ അമ്പത്തൊടി സ്വദേശി പാലപ്പറമ്പിൽ സുമേഷി (35) നെയാണ് അറസ്റ്റു ചെയ്തത്.
2012 ലാണ് പീഡനം നടന്നത്. ഇതിനുശേഷം മുങ്ങിയ പ്രതി മാനന്തവാടി മുരുക്കിൻ തേരി ട്രൈബൽ കോളനിയിൽനിന്ന് വിവാഹം കഴിച്ച് ഒളിവിൽ കഴിയുന്നതിനിടെയാണ് പിടിയിലാവുന്നത്. താനൂർ ഡി.വൈ.എസ്.പി. മൂസ വള്ളിക്കാടന്റെ നിർദേശപ്രകാരം പ്രത്യേക അന്വേഷണസംഘമാണ് പ്രതിയെ പിടികൂടിയത്. ഇയാളെ തിരൂർ പോക്സോ കോടതിയിൽ ഹാജരാക്കി റിമാൻഡ് ചെയ്തു.