അത്തിക്കയം: പെരുന്തേനരുവി-അത്തിക്കയം റോഡിൽ കൊച്ചുകുളം ഭാഗത്തേക്ക് തിരിയുന്ന ആഞ്ഞിലിമുക്ക് ജംഗ്ഷനിൽ നിൽക്കുന്ന കൂറ്റൻ ആഞ്ഞിലിമരം യാത്രക്കാർക്കും പ്രദേശവാസികൾക്കും കടുത്ത അപകടഭീഷണിയാകുന്നു. വർഷങ്ങൾ പഴക്കമുള്ള ഈ മരം അടിഭാഗം മുതൽ പോടുവന്ന് ജീർണ്ണിച്ച നിലയിലാണ്. പ്രശസ്തമായ പെരുന്തേനരുവി ടൂറിസം കേന്ദ്രത്തിലേക്ക് നിരവധിയായ സഞ്ചാരികളും കാൽനടയാത്രക്കാരും വാഹനങ്ങളും കടന്നുപോകുന്ന പ്രധാന പാതയാണിത്. നിലവിൽ വേനൽമഴയും ശക്തമായ കാറ്റുമുള്ള സമയങ്ങളിൽ ഭീതിയോടെയാണ് നാട്ടുകാരും യാത്രക്കാരും ഇതുവഴി കടന്നുപോകുന്നത്. മരം ഏതുനിമിഷവും റോഡിലേക്ക് നിലംപൊത്താവുന്ന അവസ്ഥയിലാണ്.
മരത്തിന്റെ അപകടാവസ്ഥ ചൂണ്ടിക്കാട്ടി പ്രദേശവാസികൾ പലതവണ അധികൃതരെ സമീപിച്ചെങ്കിലും യാതൊരു നടപടിയും ഉണ്ടായിട്ടില്ലെന്ന് നാട്ടുകാർ ആരോപിക്കുന്നു. മരം മുറിച്ചുമാറ്റേണ്ട അടിയന്തിര സാഹചര്യമുണ്ടായിട്ടും അധികൃതർ പുലർത്തുന്ന നിസംഗതയിൽ ശക്തമായ പ്രതിഷേധമാണ് ഉയരുന്നത്. വലിയൊരു അപകടം സംഭവിച്ച് ജീവഹാനി ഉണ്ടാകുന്നതിനു മുൻപ് തന്നെ അപകടകരമായ നിലയിൽ നിൽക്കുന്ന ആഞ്ഞിലിമരം അടിയന്തിരമായി മുറിച്ചു നീക്കാൻ ബന്ധപ്പെട്ട അധികാരികൾ തയ്യാറാകണമെന്നാണ് പ്രദേശവാസികളുടെയും സഞ്ചാരികളുടെയും ആവശ്യം.
