മട്ടന്നൂര് : ആഗസ്റ്റ് 20ന് നടന്ന വാശിയേറിയ തെരഞ്ഞെടുപ്പില് മട്ടന്നൂര് നഗരസഭ ഭരണം എല്.ഡി.എഫ് നിലനിര്ത്തി. എല്.ഡി.എഫ് 21 സീറ്റിലും യു.ഡി.എഫ് 14 സീറ്റിലും വിജയിച്ചു. എല്.ഡി.എഫിന്റെ നാല് സീറ്റുകള് യു.ഡി.എഫ് പിടിച്ചെടുത്തു. കഴിഞ്ഞ തവണത്തേക്കാള് ഏഴ് സീറ്റുകള് യു.ഡി.എഫ് അധികം നേടി. 2017ല് ഏഴ് സീറ്റുകളിലാണ് യു.ഡി.എഫ് വിജയിച്ചിരുന്നത്.
കീച്ചേരി, കല്ലൂര്, മുണ്ടയോട്, പെരുവയല്ക്കരി, ബേരം, കായലൂര്, കോളാരി, പരിയാരം, അയ്യല്ലൂര്, ഇടവേലിക്കല്, പഴശ്ശി, ഉരുവച്ചാല്, കരേറ്റ, കുഴിക്കല്, കയനി, ദേവര്കാട്, കാര, നെല്ലൂന്നി, മലക്കുതാഴെ, എയര്പോര്ട്ട്, ഉത്തിയൂര് എന്നീ വാര്ഡുകളിലാണ് എല്.ഡി.എഫ് നേടിയത്. മണ്ണൂര്, പൊറോറ, ഏളന്നൂര്, ആണിക്കരി, കളറോഡ്, പെരിഞ്ചേരി, ഇല്ലംഭാഗം, മട്ടന്നൂര്, ടൗണ്, പാലോട്ടുപള്ളി, മിനി നഗര്, മരുതായി, മേറ്റടി, നാലങ്കേരി എന്നീ വാര്ഡുകളിലാണ് യു.ഡി.എഫ് സ്ഥാനാര്ഥികള് വിജയിച്ചത്.
ആഗസ്റ്റ് 20നാണ് മട്ടന്നൂര് നഗരസഭയിലെ 35 വാര്ഡുകളിലേക്ക് തെരഞ്ഞെടുപ്പ് നടന്നത്. ഇതില് 18 വാര്ഡുകള് സ്ത്രീകള്ക്കും ഒരെണ്ണം പട്ടികജാതിക്കും സംവരണം ചെയ്തതാണ്. 111 സ്ഥാനാര്ഥികളാണ് ജനവിധി തേടിയത്. സംസ്ഥാനത്ത് തദ്ദേശ തെരഞ്ഞെടുപ്പ് നടന്ന 2020 ഡിസംബറില് മട്ടന്നൂര് നഗരസഭയില് തെരഞ്ഞെടുപ്പ് നടത്തിയിരുന്നില്ല. നിലവിലെ നഗരസഭ ഭരണസമിതിയുടെ കാലാവധി 2022 സെപ്റ്റംബര് 10നാണ് പൂര്ത്തിയാവുന്നത്. അതിനാലാണ് തദ്ദേശതെരഞ്ഞെടുപ്പിനൊപ്പം മട്ടന്നൂരില് തെരഞ്ഞെടുപ്പ് നടക്കാതിരുന്നത്.
