ചെന്നൈ: എം.ബി.ബി.എസ് സീറ്റ് തരപ്പെടുത്തി നല്‍കാമെന്നു പറഞ്ഞ് 57 ലക്ഷം രൂപ തട്ടിയ കേസില്‍ വൈദീകന്‍ ഉള്‍പ്പെടെ മൂന്നുപേരെ പോലീസ് അറസ്റ്റ് ചെയ്തു. വെല്ലൂര്‍ സായ്നാഥപുരം ഫാ. സാധു സത്യരാജ്(58), തമിഴക മക്കള്‍ മുന്നേറ്റ കഴകം വെല്ലൂര്‍ ജില്ല സെക്രട്ടറി ദേവ (40), സഹോദരന്‍ അന്‍പു (35) എന്നിവരാണ് പ്രതികള്‍.
അബൂദബിയില്‍ എന്‍ജിനീയറായ ചെങ്കല്‍പട്ട് സ്വദേശി ശ്രീനിവാസനാണ് തട്ടിപ്പിനിരയായത്. 2017-ല്‍ ശ്രീനിവാസന്റെ മകന് വെല്ലൂര്‍ സി.എം.സി മെഡിക്കല്‍ കോളജില്‍ എം.ബി.ബി.എസ് സീറ്റ് തരപ്പെടുത്താമെന്ന് വിശ്വസിപ്പിച്ചായിരുന്നു തട്ടിപ്പ്.
പിന്നീട് പണം തിരികെ ആവശ്യപ്പെട്ടപ്പോള്‍ 2018-ല്‍ പ്രവേശനം ലഭ്യമാക്കുമെന്ന് ഉറപ്പുനല്‍കിയെങ്കിലും നടന്നില്ല. തുടര്‍ന്നാണ് ശ്രീനിവാസന്‍ വെല്ലൂര്‍ ക്രൈംബ്രാഞ്ച് പോ ലീസില്‍ പരാതി നല്‍കിയത്. ദേവ, അന്‍പു എന്നിവര്‍ നിരവധി ക്രിമിനല്‍ കേസുകളില്‍ പ്രതികളാണ്.
