ബല്റാംപുര്: ഉത്തര് പ്രദേശില് മാധ്യമപ്രവര്ത്തകന്റെയും സുഹൃത്തിന്റെയും കൊലപാതകത്തില് മൂന്നുപേര് അറസ്റ്റില്. ലലിത് മിശ്ര, കേശവാനന്ദ് മിശ്ര അധവാ റിങ്കു, അരകം അലി എന്നിവരാണ് അറസ്റ്റിലായത്.
രണ്ടുദിവസം മുമ്പാണ് 35കാരനായ മാധ്യമപ്രവര്ത്തകന് രാകേഷ് സിങ്, സുഹൃത്ത് പിന്റു സാഹുവിനേയും വീട്ടില് തീകൊളുത്തി മരിച്ച നിലയില് കണ്ടെത്തിയത്. മൂന്നുപേരും കൊലപാതകകുറ്റം സമ്മതിച്ചതായി ബല്റാംപുര് പോലീസ് പറഞ്ഞു.
പ്രതികളിലൊരാളായ കേശവാനന്ദിന്റെ മാതാവ് ഗ്രാമത്തലവയാണ്. ഇവരുടെ കൈവശം വരുന്ന ഫണ്ടുമായി ബന്ധപ്പെട്ട് രാകേഷ് സിങ് ചില വെളിപ്പെടുത്തലുകള് നടത്തിയിരുന്നു. ഇതേ തുടര്ന്ന് പ്രതികള്ക്ക് രാകേഷ് സിങ്ങിനോട് പക തോന്നി. പ്രതികള് ചില സംഭാഷണങ്ങള് നടത്താനെന്ന പേരില് രാകേഷ് സിങ്ങിന്റെ വീട്ടിലെത്തുകയും എല്ലാവരും ചേര്ന്ന് മദ്യം കഴിച്ചശേഷം മാധ്യമപ്രവര്ത്തകനെയും സുഹൃത്തിനെയും കൊലപ്പെടുത്തുകയുമായിരുന്നു. കൊലപാതകം അപകടമരണമാണെന്ന് വരുത്തിതീര്ക്കാന് ആല്ക്കഹോള് അടങ്ങിയ സാനിറ്റൈസര് ഉപയോഗിച്ചാണ് വീട് കത്തിച്ചതെന്ന് പ്രതികള് മൊഴി നല്കി.
പ്രാദേശിക പത്രത്തിലാണ് രാകേഷ് സിങ് ജോലി ചെയ്തിരുന്നത്. 32 കാരനായ സുഹൃത്ത് പിന്റു സാഹുവും അദ്ദേഹത്തിനൊപ്പമുണ്ടായിരുന്നു. തീപിടുത്തത്തില് ഇരുവരുടെയും ശരീരത്തിന് 90 ശതമാനം പൊള്ളലേറ്റിരുന്നു. സാഹു സംഭവ സ്ഥലത്തുവെച്ചും രാകേഷ് ആശുപത്രിയില്വെച്ചുമാണ് മരിക്കുന്നത്. മരണത്തില് അന്വേഷണം ആവശ്യപ്പെട്ട് രാകേഷിന്റെ പിതാവ് മുന്ന സിങ് രംഗത്തെത്തിയിരുന്നു.