പാലക്കാട് : കൊവിഡ് 19നെ പ്രതിരോധിക്കാനുള്ള പരക്കം പാച്ചിലിനൊപ്പം ‘ചൂളംവിളിച്ച്’ ഇന്ത്യന് റെയില്വേ. ആശുപത്രി, മെഡിക്കല് ഉപകരണങ്ങള് യുദ്ധകാലാടിസ്ഥാനത്തില് നിര്മിക്കാന് തങ്ങളുടെ കീഴിലെ കോച്ച്, എന്ജിന് നിര്മാണ ഫാക്ടറികളോട് നിര്ദേശിച്ച് റെയില്വേ ബോര്ഡ്. വന്റിലേറ്റര്, ആശുപത്രി കട്ടില്, ട്രോളികള്, ഐവി സ്റ്റാന്ഡ്, സ്ട്രെച്ചര്, മാസ്ക്, സാനിറ്റൈസര്, വാഷ് ബേസിന്സ്, വാട്ടര് ടാങ്ക് എന്നിവ നിര്മിക്കാനാണ് ആവശ്യപ്പെട്ടിരിക്കുന്നത്. താല്ക്കാലിക ഐസൊലേഷന് കേന്ദ്രങ്ങള് നിര്മിക്കാനാവശ്യമായ ഫാബ്രിക്കേഷന്, വെല്ഡിങ് മെഷീനുകള് നിര്മിക്കാനും നിര്ദേശിച്ചിട്ടുണ്ട്.
ലോക്ഡൗണില് ഉല്പാദനം നിലച്ച ഏഴ് സ്വതന്ത്ര നിര്മാണ യൂനിറ്റുകളിലെയും സോണ് അടിസ്ഥാനത്തിലെ അറ്റകുറ്റപ്പണി കേന്ദ്രങ്ങളുടെയും മേലധികാരികള് ഇതിനുള്ള സംവിധാനം ഒരുക്കണം. ചെന്നൈ ഇന്റഗ്രല് കോച്ച് ഫാക്ടറി, ബംഗളൂരു റെയില് വീല് ഫാക്ടറി, പശ്ചിമ ബംഗാളിലെ ചിത്തരഞ്ജന് ലോക്കോമോട്ടിവ് വര്ക്സ്, കപൂര്ത്തല റെയില് കോച്ച് ഫാക്ടറി, വാരണാസിയിലെ ഡീസല് ലോക്കോമോട്ടിവ് വര്ക്സ് തുടങ്ങിയവ പ്രധാന നിര്മാണ കേന്ദ്രങ്ങളില് ഉള്പ്പെട്ടവയാണ്. ഉത്തരേന്ത്യയിലെ ചില കേന്ദ്രങ്ങളില് മാസ്കും സാനിറ്റൈസറും നിര്മിച്ച് തുടങ്ങി.
