ആലുവ : ആലുവയില് ചുമയും ശ്വാസംമുട്ടലും മൂലം ആശുപത്രിയിലെത്തിയ സെക്യൂരിറ്റി ജീവനക്കാരന് കുഴഞ്ഞ് വീണ് മരിച്ചു. ആലുവ ജില്ലാ ആശുപത്രിയിലാണ് സംഭവം. ചികിത്സ കിട്ടാതെയാണ് മരിച്ചതെന്ന് ബന്ധുക്കള് ആരോപിച്ചു. ജില്ലാ ആശുപത്രിയില് ആംബുലന്സില് എത്തിച്ച സെക്യൂരിറ്റി ജീവനക്കാരന് വിജയനാണ് മരിച്ചത്.
ആലുവ പുളിഞ്ചോടിലെ സെക്യൂരിറ്റി ജീവനക്കാരനാണ് വിജയന്. രാവിലെ 9.15 ഓടേയാണ് ഇദ്ദേഹത്തിന് ശ്വാസംമുട്ടല് അനുഭവപ്പെട്ടത്. ഉടനെ തന്നെ ആംബുലന്സ് വരുത്തിച്ച് ആലുവ ജില്ലാ ആശുപത്രിയിലേക്ക് കൊണ്ടുപോയി. ആശുപത്രിയില് വെച്ചാണ് സെക്യൂരിറ്റി ജീവനക്കാരന് മരിച്ചത്.
രാവിലെ 9.15ന് എത്തിച്ച സെക്യൂരിറ്റി ജീവനക്കാരന് ചികിത്സ നല്കുന്നതില് ആശുപത്രി അധികൃതര്ക്ക് വീഴ്ച സംഭവിച്ചതായി ആരോപണം ഉയര്ന്നിട്ടുണ്ട്. ഇദ്ദേഹം പത്തു മണിയോടെയാണ് മരിക്കുന്നത്. ഇതുവരെ ചികിത്സ നിഷേധിക്കുകയായിരുന്നുവെന്നാണ് റിപ്പോര്ട്ടുകള്.
ആദ്യം ക്യാഷ്വലിറ്റിയിലാണ് കൊണ്ടുപോയത്. എന്നാല് ശ്വാസംമുട്ടലും ചുമയും അനുഭവപ്പെടുന്നുണ്ട് എന്ന് പറഞ്ഞതോടെ കോവിഡ് സംശയത്തില് വിജയനോട് പനിവാര്ഡിലേക്ക് പോകാന് നിര്ദേശിച്ചു. ഇവിടെ വൈദ്യുതി ഉണ്ടായിരുന്നില്ല. തുടര്ന്ന് കോവിഡ് വാര്ഡിലേക്ക് കൊണ്ടുപോയി. ഇതിനിടെയാണ് കുഴഞ്ഞുവീണ് മരിച്ചത്.
മുക്കാല് മണിക്കൂറോളം ചികിത്സ നിഷേധിച്ചതായി ആംബുലന്സ് ഡ്രൈവര് പറയുന്നു. നടന്ന് ആംബുലന്സില് കയറിയ ആളാണ് ആശുപത്രി അധികൃതരുടെ അനാസ്ഥ കാരണം മരിച്ചതെന്നും ഡ്രൈവര് ആരോപിച്ചു.
