കോട്ടയം: മീനച്ചില് ഈസ്റ്റ് അര്ബന് കോ-ഓപ്പറേറ്റീവ് ബാങ്ക് ഭരണസമിതി തെരഞ്ഞെടുപ്പ് ഒക്ടോബര് എട്ടിന് മുന്പായി നടത്താന് ഹൈക്കോടതി വിധി. സെപ്റ്റംബര് 18ന് നിശ്ചയിച്ചിരുന്ന ഭരണസമിതി തെരഞ്ഞെടുപ്പ് പതിനാറാം തീയതി സഹകരണ തെരഞ്ഞെടുപ്പ് കമ്മീഷന് മാറ്റിവെക്കുകയായിരുന്നു. ഇതിനെതിരെ ബാങ്ക് ഭരണസമിതി ഹൈക്കോടതിയെ സമീപിച്ചിരുന്നു. ഈ ഹര്ജിയിലാണ് ഭരണസമിതിയുടെ കാലാവധി അവസാനിക്കുന്ന ഒക്ടോബര് എട്ടാം തീയതിയോ അതിന് മുന്പോ തെരഞ്ഞെടുപ്പ് നടത്താന് സഹകരണ തെരഞ്ഞെടുപ്പ് കമ്മീഷനോട് ഹൈക്കോടതി ഉത്തരവിട്ടത്.
സ്ഥാപനത്തിന്റെ നല്ലതിന് ജനകീയ ഭരണസമിതി തുടരേണ്ടതാണെന്നും അഡ്മിനിസ്ട്രേറ്റര് ഭരണം ഒഴിവാക്കാന് ഭരണസമിതിയുടെ കാലാവധി തീരുന്ന അന്നോ അതിന് മുന്പോ തെരഞ്ഞെടുപ്പ് നടത്തിയിരിക്കണമെന്നും ഹൈക്കോടതി നിര്ദേശിച്ചു. തെരഞ്ഞെടുപ്പ് കാര്യങ്ങളിലെ ജോയിന്റ് രജിസ്ട്രാറുടെ അനധികൃത ഇടപെടലിനെയും ഹൈക്കോടതി വിമര്ശിച്ചു. ബാങ്ക് ഭരണ സമിതിക്കുവേണ്ടി മുതിര്ന്ന അഭിഭാഷകരായ അഡ്വ.ജോര്ജ് പൂന്തോട്ടം,അഡ്വ. ജോയ് ജോര്ജ് അടുക്കം എന്നിവര് ഹാജരായി.
