തിരുവനന്തപുരം: പട്ടാപ്പകല് പെട്രോള് പമ്പ് മാനേജരില് നിന്ന് രണ്ടര ലക്ഷം രൂപ കവര്ന്ന കേസിലെ പ്രതികളെ എത്തിച്ച് തെളിവെടുത്തു. പ്രമുഖ റീല്സ് താരവുമായ മീശ വിനീത് എന്ന കിളിമാനൂര് കീഴ്പേരൂര് കിട്ടുവയലില് വീട്ടില് വിനീത് (26), കൂട്ടാളി കിളിമാനൂര് വെള്ളല്ലൂര് കാട്ടുചന്ത ചിന്ത്രനല്ലൂര് ചാവരുകാവില് പുതിയ തടത്തില് വീട്ടില് ജിത്തു (22) എന്നിവരെയാണ് തെളിവെടുപ്പിന് എത്തിച്ചത്. മോഷ്ടിച്ച സ്കൂട്ടറിലെത്തി പെട്രോള് പമ്പ് മാനേജരില് നിന്ന് കവര്ച്ച നടത്തുകയായിരുന്നു. ടിക് ടോക് താരമായ മീശ വിനീത് പത്തോളം മോഷണ കേസുകളിലും തമ്പാനൂര് സ്റ്റേഷനില് ബലാല്സംഗ കേസിലും പ്രതിയാണ്.
ഇന്ന് രാവിലെ ആണ് റിമാന്ഡിലായിരുന്ന ഇവരെ മംഗലപുരം പോലീസ് കസ്റ്റഡിയില് വാങ്ങി തെളിവെടുപ്പു നടത്തിയത്. നഗരൂരില് നിന്ന് മോഷ്ടിച്ച ബൈക്കിലെത്തിയാണ് ഇവര് കവര്ച്ച നടത്തിയത്. കവര്ച്ചയ്ക്കു ശേഷം സ്കൂട്ടര് ഉപേക്ഷിച്ച് കടന്ന ഇവര് പല സ്ഥലങ്ങളില് ലോഡ്ജുകളില് മാറി മാറി താമസിക്കുകയായിരുന്നു. ഇവരെ തൃശൂരിലെ ലോഡ്ജില് നിന്നാണ് മംഗലപുരം പോലീസും ഡാന്സാഫ് ടീമും ചേര്ന്ന് പിടികൂടിയത്. കഴിഞ്ഞ മാര്ച്ച് 23 ന് ആയിരുന്നു കണിയാപുരത്തുള്ള എസ്ബിഐയുടെ പള്ളിപ്പുറം ശാഖയുടെ മുന്നില് വച്ച് കവര്ച്ച നടത്തിയത്.
