പരിസ്ഥിതി പുനഃസ്ഥാപന പ്രവര്ത്തനങ്ങളുടെ ഭാഗമായി ഹരിതകേരളം മിഷന്റെ നേതൃത്വത്തില് തെരഞ്ഞെടുക്കപ്പെട്ട സ്ഥാപനങ്ങളില് മെന്സ്ട്രുവല് കപ്പും നാപ്കിന് സംസ്കരണത്തിനുള്ള ഇന്സിനറേറ്ററും വിതരണം ചെയ്യുന്നു. പദ്ധതിയുടെ സംസ്ഥാനതല ഉദ്ഘാടനം ജനുവരി 20 ന് ഉച്ചയ്ക്ക് രണ്ടിന് കൊല്ലം വെളിയം ഗ്രാമപഞ്ചായത്തിലെ മുട്ടറ ഗവ. ഹയര് സെക്കന്ഡറി ആന്ഡ് വൊക്കേഷണല് ഹയര് സെക്കന്ഡറി സ്കൂളില് ധനകാര്യവകുപ്പ് മന്ത്രി കെ.എന്. ബാലഗോപാല് നിര്വഹിക്കും. കൊല്ലം ജില്ലാ പഞ്ചായത്ത് പ്രസിഡന്റ് ആര്. ലതാദേവി അധ്യക്ഷത വഹിക്കും.
ആര്ത്തവ ശുചിത്വ ഉത്പന്നങ്ങളുടെ പ്രചാരണവും ആര്ത്തവ ആരോഗ്യവും സംബന്ധിച്ച ബോധവല്ക്കരണവും പദ്ധതി ലക്ഷ്യമിടുന്നു. 2025-26 സംസ്ഥാന ബജറ്റില് വകയിരുത്തിയ തുക ഉപയോഗിച്ച് എച്ച്.എല്.എല്. ലൈഫ് കെയറുമായി ചേര്ന്നാണ് പദ്ധതി നടപ്പാക്കുന്നത്. ആര്ത്തവകാല ഉപയോഗ ശേഷമുള്ള സാനിറ്ററി നാപ്കിനുകളുടെ ശാസ്ത്രീയ സംസ്കരണത്തിന് വിദ്യാര്ഥിനികള് കൂടുതലുള്ള സ്കൂളുകളിലും കോളേജുകളിലുമായി 322 ഇടങ്ങളില് ഇന്സിനറേറ്റര് സ്ഥാപിക്കും. തെരഞ്ഞെടുത്ത സ്കൂളുകളിലും കോളേജുകളിലും കുടുംബശ്രീ അയല്ക്കൂട്ടങ്ങളിലുമായി 1.69 ലക്ഷം മെന്സ്ട്രുവല് കപ്പുകള് പദ്ധതിയിലൂടെ വിതരണം ചെയ്യും. സ്കൂളുകളിലും കോളേജുകളിലും മതിയായ ആര്ത്തവ ശുചിത്വ സംവിധാനങ്ങള് സജ്ജമാക്കുക, പരിസ്ഥിതി സൗഹൃദ ആര്ത്തവ ശുചിത്വ ഉപകരണങ്ങള് ലഭ്യമാക്കുക തുടങ്ങിയവയും പദ്ധതി ലക്ഷ്യമിടുന്നു. പദ്ധതി ഗുണഭോക്താക്കള്ക്കായി ക്ലാസും ശില്പശാലയും സംഘടിപ്പിക്കും.
