എറണാകുളം: പെരുമ്പാവൂര്‍ ഓടക്കാലി ജംഗ്ഷനിലുള്ള യൂണിവേഴ്സല്‍ പ്ലൈവുഡ് കമ്പനിയിലെ മാലിന്യം കത്തിക്കുന്ന കുഴിയില്‍ വീണ ഇതരസംസ്ഥാന തൊഴിലാളിയെ ഇതുവരെ കണ്ടെത്താനായില്ല. രാവിലെ ഏഴ് മണിക്കാണ് പ്ലൈവുഡ് ഫാക്ടറിയിലെ ഇതരസംസ്ഥാന തൊഴിലാളിയായ കൊല്‍ക്കത്ത നസീര്‍ മാലിന്യം കത്തിക്കുന്ന കുഴിയില്‍ വീണത്. 10 മണിക്കൂറുകള്‍ പിന്നിട്ടിട്ടും ഇയാളെ കണ്ടെത്താന്‍ സാധിച്ചിട്ടില്ല. അതേസമയം കനലിന്റെ അകത്തേക്കാണ് ആള്‍ പോയിട്ടുണ്ടാകാനാണ് സാധ്യതയെന്ന് അസിസ്റ്റന്റ് സ്റ്റേഷന്‍ ഓഫീസര്‍ സുബ്രഹ്മണ്യന്‍ പറഞ്ഞു.
ആറ് ഫയര്‍ എഞ്ചിനുകള്‍ ചേര്‍ന്ന് നടത്തുന്ന രക്ഷാ പ്രവര്‍ത്തനം മണിക്കൂറുകള്‍ പിന്നിട്ടിട്ടും നസീറിനെ പുറത്തെടുക്കാന്‍ സാധിച്ചിട്ടില്ല. 15 അടി താഴ്ചയിലേക്കാണ് ഇയാള്‍ വീണിരിക്കുന്നത്. കുഴിയില്‍ നിന്ന് പുക ഉയര്‍ന്നതിനെ തുടര്‍ന്ന് നനക്കാന്‍ എത്തിയപ്പോളാണ് ഇയാള്‍ കുഴിയിലേക്ക് വീണുപോയത്. മാലിന്യം ഇളക്കി മാറ്റിയാണ് തിരച്ചില്‍ നടത്തുന്നത്. കൊല്‍ക്കത്ത സ്വദേശിയായ നസീര്‍ ഇവിടെ താത്ക്കാലികമായി ജോലിക്ക് വന്ന തൊഴിലാളിയാണ്.
