അമ്പലപ്പുഴ : പൊങ്കാലയില്‍ പങ്കെടുത്ത ഭക്തരുടെ മാല മോഷ്ടിച്ചെന്ന കേസില്‍ നാല് തമിഴ് നാടോടികള്‍ അറസ്റ്റില്‍. പുറക്കാട് പുന്തല ഭഗവതി ക്ഷേത്രത്തിലെ കാര്‍ത്തിക പൊങ്കാലയില്‍ പങ്കെടുത്തവരുടെ മാല മോഷ്ടിച്ചെന്ന കേസിലാണ് മധുര തിരുമംഗലം സ്വദേശികളായ സാദന (44), കട്ടമ്മ (30), പ്രിയ (40), മധു (37) എന്നിവര്‍ അറസ്റ്റിലായത്.
പുറക്കാട് കൈപ്പള്ളിയില്‍ ശോഭനയുടെ മൂന്നേകാല്‍ പവന്‍ മാലയും പുറക്കാട് പുത്തന്‍പറമ്പ് അനീഷിന്റെയും സീനയുടെയും മകന്‍ ആയുഷിന്റെ ഒരു പവന്‍ മാലയുമാണ് മോഷണം പോയതായി പരാതി നല്‍കിയത്. വെള്ളിയാഴ്ച രാവിലെ 8.30 മണിയോടെയായിരുന്നു സംഭവം. പൊങ്കാലയില്‍ പങ്കെടുത്ത ഭക്തരോടൊപ്പം തമിഴ് നാടോടികള്‍ കേരളീയ വേഷം ധരിച്ച്‌ സജീവമായിരുന്നു.
ഭക്തരുടെ വിളക്കുകളും പൂജാ സാധനങ്ങളും സുരക്ഷിതമായി വയ്ക്കാനും സഹായിക്കുന്നതിനിടെയാണ് മോഷണം നടന്നതെന്ന് പോലീസ് പറഞ്ഞു. മോഷണത്തിന് ശേഷം കടന്ന നാടോടികളെ ഗ്രാമ പഞ്ചായത്ത് അംഗം ജി സുഭാഷ്, ക്ഷേത്രം ഭാരവാഹികള്‍ എന്നിവര്‍ ചേര്‍ന്നാണ് പിടികൂടി പോലീസിനു കൈമാറിയത്. പ്രതികളെ കോടതിയില്‍ ഹാജരാക്കി.
