തിരുവനന്തപുരം : കേരളത്തിന് ലഭിക്കാനുള്ള മണ്ണെണ്ണ വിഹിതം കേന്ദ്രം കുറച്ചെന്ന് ഭക്ഷ്യ മന്ത്രി ജി.ആര് അനില്. സംസ്ഥാനം മണ്ണെണ്ണ വിതരണം ചെയ്യുന്നില്ലെന്ന കേന്ദ്രമന്ത്രി വി.മുരളീധരന്റെ വാദം അടിസ്ഥാന രഹിതമാണ്.
സാമ്പത്തിക വിഹിതം വിട്ടുകിട്ടാന് വി.മുരളിധരന് ഇടപെടുകയാണ് വേണ്ടതെന്ന് ഭക്ഷ്യ മന്ത്രി പ്രമുഖ മാധ്യമത്തോട് പറഞ്ഞു. കേരളത്തിനുള്ള മണ്ണെണ്ണ വിഹിതം 40 ശതമാനമാണ് കേന്ദ്രം വെട്ടിക്കുറച്ചിരിക്കുന്നത്. മണ്ണെണ്ണ വില കുത്തനേ കൂടുകയും ചെയ്തു. ഈ മാസം ലിറ്ററിന് 22 രൂപ കൂടി വര്ധിച്ചു. 59 രൂപക്ക് പകരം 81 രൂപയാണ് ഒരു ലിറ്ററിന് നല്കേണ്ടി വരിക. മൊത്ത വ്യാപാര വില 77 രൂപയായി ഉയര്ന്നിട്ടുണ്ട്.
എണ്ണകമ്പനികള് റേഷന് വിതരണത്തിനായി കെറോസിന് ഡീലേഴ്സ് അസോസിയേഷന് നല്കിയിരിക്കുന്ന വിലയിലാണ് വര്ധനവ്. വില വര്ധനവ് മത്സ്യ ബന്ധന മേഖലയ്ക്കും കനത്ത തിരിച്ചടിയാകും. മറ്റ് നികുതികള് ഉള്പ്പെടാതെ ലിറ്ററിന് 70 രൂപയില് അധികമാണ്. ഇത് റേഷന് കടകളില് എത്തുമ്പോള് 81 രൂപയാകും. കേരളത്തിന്റെ ആവശ്യങ്ങള് പരിഗണിക്കാതെയാണ് വില വര്ധനവും ഒപ്പം വിഹിതം വെട്ടിക്കുറച്ചതും.
