കോട്ടയം : കഴിഞ്ഞദിവസങ്ങളിലുണ്ടായ കനത്ത മഴയില്‍ ഉരുള്‍പൊട്ടലും തുടര്‍ന്നുണ്ടായ പ്രളയവും മൂലം ജില്ലയില്‍ വിവിധയിടങ്ങളിലായി 63 ലക്ഷം രൂപയുടെ റേഷന്‍ ഉത്‌പന്നങ്ങള്‍ നശിച്ചതായി ഭക്ഷ്യമന്ത്രി ജി.ആര്‍ അനില്‍ പറഞ്ഞു. കോട്ടയത്ത് സിവില്‍ സപ്ലൈസ് ഉദ്യോഗസ്ഥരുമായി കൂടിക്കാഴ്ച നടത്തിയ മന്ത്രി പ്രളയബാധിത പ്രദേശത്ത് റേഷന്‍ വിതരണത്തിന് തടസ്സമുണ്ടാകാത്തവിധം മൊബൈല്‍ റേഷന്‍ഷോപ്പുകളടക്കം പ്രവര്‍ത്തിപ്പിക്കാനും നിര്‍ദേശം നല്‍കി.
അടിയന്തരമായി റേഷന്‍വിതരണം പുനഃസ്ഥാപിക്കുന്നതിനും റേഷന്‍കാര്‍ഡ് നഷ്ടപ്പെട്ട കുടുംബങ്ങള്‍ക്ക് അടിയന്തരമായി കാര്‍ഡ് ലഭിക്കുന്നതിനുംവേണ്ട നടപടികള്‍ സ്വീകരിച്ചതായും മന്ത്രി പറഞ്ഞു. കാഞ്ഞിരപ്പള്ളി താലൂക്കിലാണ് നഷ്ടമേറെ. താലൂക്കിലെ 13 റേഷന്‍കടകളിലെയും മീനച്ചില്‍ താലൂക്കിലെ നാല്‌ റേഷന്‍കടകളിലെയും ചങ്ങനാശ്ശേരി താലൂക്കിലെ രണ്ട് റേഷന്‍കടകളിലെയും ഉള്‍പ്പെടെ 19 കടകളിലെ റേഷന്‍ ഉത്‌പന്നങ്ങള്‍ നശിച്ചു.
