വയനാട് : കൊറോണ വൈറസ് പശ്ചാത്തലത്തില് വയനാട് ജില്ലയില് നിരീക്ഷണത്തിലുള്ള ആരുടെയും നില ഗുരുതരമല്ലെന്ന് ഗതാഗത മന്ത്രി എ.കെ ശശീന്ദ്രന് പറഞ്ഞു. ജില്ലയിലെ എല്ലാ ടൂറിസം കേന്ദ്രങ്ങളും അടയ്ക്കാന് മന്ത്രിയുടെ അധ്യക്ഷതയില് ചേര്ന്ന യോഗത്തില് തീരുമാനമായി. രോഗ പ്രതിരോധത്തിന്റെ ഭാഗമായി കര്ശന നിയന്ത്രണങ്ങളാണ് വയനാട് ജില്ലയില് ഏര്പ്പെടുത്തിയിരിക്കുന്നത്. ഡിടിപിസിയുടെ കീഴിലുള്ളതടക്കം ജില്ലയിലെ ടൂറിസം കേന്ദ്രങ്ങളെല്ലാം അടച്ചിടനാണ് തീരുമാനം. ജിംനേഷ്യം, നീന്തല് കുളങ്ങള്, കോച്ചിംഗ് സെന്ററുകള് എന്നിവ ഇനിയൊരറിയിപ്പുണ്ടാകുന്നതുവരെ തുറന്നുപ്രവര്ത്തിക്കരുത്. നിലവില് പേടിക്കേണ്ട സാഹചര്യമില്ല. നിരീക്ഷണത്തില് കഴിയുന്നവരോട് മോശമായി പെരുമാറുകയോ ഒറ്റപ്പെടുത്തുകയോ ചെയ്യരുതെന്നും മന്ത്രി പറഞ്ഞു. അതേസമയം വരും ദിവസങ്ങളില് അതിര്ത്തി ചെക്ക് പോസ്റ്റുകള് പരിശോധനകള് ശക്തമാക്കാന് യോഗം വിളിച്ചിട്ടുണ്ട്. വയനാട്ടില് കുരങ്ങുപനി നിയന്ത്രണവിധേയമാണെന്നും അദ്ദേഹം വ്യക്തമാക്കി. കുരങ്ങുപനി ബാധിച്ച എല്ലാവരും തിരുനെല്ലി പഞ്ചായത്തിലുള്ളവരാണ്. പ്രദേശത്ത് രോഗപ്രതിരോധ പ്രവര്ത്തനങ്ങളും ബോധവല്ക്കരണവും ഇനിയും ശക്തമായി തുടരുമെന്നും മന്ത്രി എ കെ ശശീന്ദ്രന് അറിയിച്ചു .
