കോഴിക്കോട് : അനധികൃത പരസ്യബോര്ഡുകള് നീക്കംചെയ്യാനുള്ള മന്ത്രിയുടെ നിര്ദേശത്തില് കോഴിക്കോട്ടെ സിപിഎം രണ്ടുതട്ടില്. പൊതുമരാമത്ത് റോഡരികില് സ്ഥാപിച്ച പരസ്യ ബോര്ഡുകളെ ചൊല്ലിയാണ് മന്ത്രി പി.എ.മുഹമ്മദ് റിയാസും സിപിഎം ജില്ലാ നേതൃത്വവും ഉടക്കുന്നത്. വിഷയം സിപിഎം ജില്ലാ കമ്മിറ്റിയിലും കോര്പ്പറേഷന് കൗണ്സിലിലും ഇന്ന് ചര്ച്ചയ്ക്ക് വന്നേക്കും.
സിപിഎം ജില്ലാനേതാക്കളില് ചിലരുമായി ഏറെ അടുപ്പമുള്ളവര്ക്കാണ് കോഴിക്കോട് കോര്പ്പറേഷന് പരിധിയില് പരസ്യബോര്ഡുകള്ക്കുള്ള കരാര് നല്കുന്നതെന്ന് നേരത്തെതന്നെ ആക്ഷേപമുണ്ടായിരുന്നു. അത്തരത്തിലൊരു കമ്പനി നിര്മ്മിച്ച മൂന്ന് ബസ് കാത്തിരിപ്പ് കേന്ദ്രം പൊതുമരാമത്ത് മന്ത്രി പി.എ.മുഹമ്മദ് റിയാസിന്റെ നിര്ദേശപ്രകാരം കഴിഞ്ഞദിവസം പൊളിച്ചുമാറ്റിയിരുന്നു. ഓവുചാല് നിര്മാണത്തിന് തടസമുണ്ടെന്ന പരാതി മുന്നിര്ത്തിയായിരുന്നു നടപടി. എങ്കിലും പാര്ട്ടിയിലെ മുതിര്ന്നനേതാവുമായി അടുപ്പമുള്ള പരസ്യകമ്പനി ഉടമയെ ലക്ഷ്യംവെച്ചാണ് മന്ത്രിയുടെ നീക്കമെന്ന് വ്യക്തമായിരുന്നു. വിഷയം കോര്പ്പറേഷന് കൗണ്സിലില് ഉള്പ്പടെ സജീവചര്ച്ചയാക്കാനാണ് കോണ്ഗ്രസ് തീരുമാനം.
അനധികൃത പരസ്യബോര്ഡുകള് നീക്കംചെയ്യാനുള്ള മന്ത്രിയുടെ തീരുമാനം കോര്പ്പറേഷന്റെ അധികാര പരിധിയില് കൈകടത്തലാണെന്ന് സിപിഎം ജില്ലാനേതൃത്വം ചൂണ്ടിക്കാട്ടിയിരുന്നു. എന്നാല് അടുപ്പക്കാരെ സംരക്ഷിക്കാന് കോര്പ്പറേഷനും പൊതുമരാമത്ത് വകുപ്പുമായുള്ള തര്ക്കമായി വിഷയത്തെ മാറ്റാനാണ് ചിലനേതാക്കള് ശ്രമിക്കുന്നതെന്ന് പാര്ട്ടിക്കുള്ളിലും വിമര്ശനമുണ്ട്. കോഴിക്കോട്ടെ പൊതുമരാമത്ത് റോഡിലുള്ള മുഴുവന് അനധികൃത പരസ്യബോര്ഡുകളുടെയും എണ്ണമെടുത്ത് അവ നീക്കംചെയ്യാനാണ് മന്ത്രി പി.എ മുഹമ്മദ് റിയാസിന്റെ നിര്ദേശം.
