തിരുവനന്തപുരം : ബിസിസിഐ ക്വാട്ട കളി എന്ന് അവസാനിപ്പിക്കുമെന്ന് വിദ്യാഭ്യാസ മന്ത്രി വി. ശിവന്കുട്ടി. ഋഷഭ് പന്തിന് വേണ്ടി സഞ്ജുവിനെ പന്ത് തട്ടുന്നത് എന്തിന് വേണ്ടിയെന്നും ശിവന്കുട്ടി ചോദിച്ചു.
ശിവന്കുട്ടിയുടെ വാക്കുകള് :
ടി ട്വന്റി ലോകകപ്പ് സെമിയില് ഇംഗ്ലണ്ടിനോട് ഇന്ത്യ തോറ്റു പുറത്തായത് ദൗര്ഭാഗ്യകരമാണ്. അതില് വേദനയുണ്ട്. ഈ തോല്വിക്ക് കാരണം ബിസിസിഐയും സെലക്ടര്മാരുമാണ്. വിക്കറ്റ് കീപ്പര്/ ബാറ്ററായി ലോകകപ്പ് ടീമില് ഇടം പിടിച്ചത് ഋഷഭ് പന്തും ദിനേശ് കാര്ത്തിക്കുമാണ്. ഇരുവരുടെയും ലോകകപ്പിലെ പ്രകടനം ഒന്ന് പരിശോധിച്ചു നോക്കുക. ഒരു കളിയില് പോലും രണ്ടക്കം കടക്കാന് ഇരുവര്ക്കും ആയിട്ടില്ലന്നും അദ്ദേഹം വ്യക്തമാക്കി.
മികച്ച പവര് ഹിറ്ററായ ഫോമിലുള്ള മികച്ച ശരാശരിയുള്ള സഞ്ജു സാംസണെ തഴഞ്ഞാണ് ഇരുവരെയും ടീമില് എടുത്തത്. ഇത് തികഞ്ഞ അനീതി ആണെന്ന് ഞാന് ആ ഘട്ടത്തില് തന്നെ വ്യക്തമാക്കിയത്. മറ്റൊരു ഉദാഹരണം നോക്കുക. വരാന് പോകുന്ന ന്യൂസിലന്ഡ് പരമ്പരയില് ഏകദിനത്തിലും ടി ട്വന്റിയിലും വൈസ് ക്യാപ്റ്റന് ആയിട്ടാണ് ഋഷഭ് പന്തിനെ നിയോഗിച്ചിട്ടുള്ളത്. അതായത് എങ്ങിനെ ഫോം ഔട്ട് ആണെങ്കിലും ടീമില് നിലനിര്ത്തുക എന്നതാണ് അജണ്ട. സഞ്ജുവിനെ ഉള്പ്പെടുത്തിയിരിക്കുന്നതാകട്ടെ ബാറ്ററായി മാത്രം. ബംഗ്ലാദേശ് പരമ്പരയ്ക്കുള്ള ഏകദിന ടീമിനെ പ്രഖ്യാപിച്ചിട്ടുണ്ട്. അതിലും ഋഷഭ് പന്ത് ഉണ്ട്. സഞ്ജു ഇല്ല താനും എന്ന് അദ്ദേഹം വ്യക്തമാക്കി.
