തിരുവനന്തപുരം: കാലാവസ്ഥാ വ്യതിയാനം കാരണം സംസ്ഥാനത്ത് ഡെങ്കിപ്പനി, എലിപ്പനി, ജലജന്യ രോഗങ്ങള് എന്നിവ വര്ധിക്കാന് സാധ്യതയുള്ളതിനാല് വളരെ ശ്രദ്ധിക്കണമെന്ന് ആരോഗ്യ വകുപ്പ് മന്ത്രി വീണാ ജോര്ജ്. മന്ത്രിയുടെ നേതൃത്വത്തില് ചേർന്ന സ്റ്റേറ്റ് ലെവല് റാപ്പിഡ് റെസ്പോണ്സ് ടീം (ആര്ആര്ടി) യോഗത്തിലാണ് നിർദേശം. ആരോഗ്യ വകുപ്പിന്റെ നേതൃത്വത്തില് എല്ലാ തദ്ദേശ സ്ഥാപനങ്ങളും മേയ് 15നകം മൈക്രോ പ്ലാന് തയ്യാറാക്കണം. കൊതുകുജന്യ രോഗങ്ങള് വര്ധിക്കാന് സാധ്യതയുള്ളതിനാല് ആരോഗ്യ ജാഗ്രതാ കലണ്ടര് പ്രകാരം ഫീല്ഡ്തല പ്രവര്ത്തനങ്ങള് ശക്തിപ്പെടുത്തണം. തദ്ദേശ സ്ഥാപനങ്ങള് കൃത്യമായ കൊതുക് നിവാരണ പ്രവര്ത്തനങ്ങള് നടത്തണം.
ഹോട്ട് സ്പോട്ടുകള് കണ്ടെത്തി പ്രവര്ത്തനങ്ങള് ശക്തമാക്കണം. പൊതുജനാരോഗ്യ നിയമ പ്രകാരം സ്വകാര്യ ആശുപത്രികള് ഉള്പ്പെടെ രോഗങ്ങള് കൃത്യമായി റിപ്പോര്ട്ട് ചെയ്യണമെന്നും മന്ത്രി നിര്ദേശം നല്കി. ആര്ആര്ടി യോഗത്തിൽ സംസ്ഥാനത്തെ പൊതു സാഹചര്യം വിലയിരുത്തി. പേവിഷബാധ പ്രതിരോധ വാക്സിനെതിരായ പ്രചരണം അപകടകരമാണ്. ശാസ്ത്രീയമായ അറിവുകള് കൊണ്ട് ഇത്തരം പ്രചരണങ്ങള് തടയണം. ഓരോ ബാച്ച് വാക്സിന്റേയും ഗുണഫലം സെന്ട്രല് ലാബില് ഉറപ്പ് വരുത്തിയതിന് ശേഷമാണ് വിതരണം നടത്തുന്നത്. പേവിഷബാധയ്ക്കുള്ള പ്രതിരോധ വാക്സിനുകള് കുറവ് വരാതെ എല്ലായിടത്തും ഉറപ്പാക്കണം.
ഡെങ്കിപ്പനി, എലിപ്പനി എന്നിവയ്ക്കെതിരെ ജാഗ്രത പാലിക്കണം. പ്രാരംഭ ഘട്ടത്തില് ചികിത്സിക്കാത്തത് കൊണ്ടാണ് എലിപ്പനി മരണങ്ങള് പലപ്പോഴും ഉണ്ടാകുന്നത്. അതിനാല് മലിന ജലത്തിലിറങ്ങിയവര് നിര്ബന്ധമായും ആരോഗ്യ പ്രവര്ത്തകരുടെ നിര്ദേശാനുസരണം എലിപ്പനി പ്രതിരോധ ഗുളിക കഴിക്കണം. കൈകാലുകളില് മുറിവുകളുള്ളവര് വെള്ളം സമ്പര്ക്കത്തില് വരാതെ ഇരിക്കുന്നതിനാവശ്യമായ വ്യക്തിഗത സുരക്ഷാ മാര്ഗങ്ങള് സ്വീകരിക്കണം. ജലജന്യ രോഗങ്ങള് ഉണ്ടാകാന് സാധ്യതയുള്ളതിനാല് ശുദ്ധമായ വെള്ളം കുടിക്കാന് ശ്രദ്ധിക്കണം. തിളപ്പിച്ചാറ്റിയ വെള്ളമാണ് അഭികാമ്യം. എന്തെങ്കിലും രോഗ ലക്ഷണങ്ങള് കണ്ടാല് ഉടന് ചികിത്സ തേടേണ്ടതാണെന്നും മന്ത്രി പറഞ്ഞു.
