ദില്ലി: പ്രായപൂര്ത്തിയാകാത്ത പെണ്കുട്ടിയുടെ മൃതദേഹം വലിച്ചിഴച്ച ബംഗാള് പോലീസിനെ വിമര്ശിച്ച് ദേശീയ ബാലാവകാശ സംരക്ഷണ കമ്മീഷന് ചെയര്മാന്. അപമാനകരമായ രീതിയില് മൃതദേഹം കൊണ്ടുപോയെന്ന് എന്സിപിസിആര് ചെയര്മാന് പ്രിയങ്ക് കനൂംഗോ കുറ്റപ്പെടുത്തി. ഉദ്യോഗസ്ഥര് വെള്ള തുണിയില് മൃതദേഹം കൊണ്ടുപോകുന്നതിന്റെ വീഡിയോ ട്വീറ്റ് ചെയ്തുകൊണ്ടാണ് അദ്ദേഹത്തിന്റെ വിമര്ശനം.
പെണ്കുട്ടിയെ ബലാത്സംഗം ചെയ്ത് കൊലപ്പെടുത്തിയെന്ന് പ്രദേശവാസികള് ആരോപിച്ചതിനെത്തുടര്ന്ന് കുട്ടി ലൈംഗികമായി പീഡിപ്പിക്കപ്പെട്ടോ എന്നറിയാന് മൃതദേഹം പോസ്റ്റുമോര്ട്ടത്തിനായി അയച്ചിരിക്കുകയാണ്. കാളിയഗഞ്ചില് മൃതദേഹം കണ്ടെടുക്കുന്നതിനിടെ പോലീസ് ഉദ്യോഗസ്ഥര് മൃതദേഹം റോഡില് വലിച്ച സംഭവത്തില് ഉള്പ്പെട്ട നാല് എഎസ്ഐമാരെയും പിന്നീട് സസ്പെന്ഡ് ചെയ്തു.
