രാജാക്കാട് : പ്രായപൂര്ത്തിയാകാത്ത പെണ്കുട്ടിയുടെ വിവാഹം നടത്തിയ സംഭവത്തില് ക്ഷേത്രപൂജാരിയും വരനും അടക്കം അഞ്ച് പേര്ക്കെതിരെ പോലീസ് കേസ് എടുത്തു. ബൈസണ്വാലിയിലെ ശ്രീമാരിയമ്മന് ക്ഷേത്ര മണ്ഡപത്തിലാണ് പ്രായപൂര്ത്തിയാകാത്ത പെണ്കുട്ടിയുടെ വിവാഹം നടന്നത്. പിന്നാലെ ശൈശവ വിവാഹ നിരോധന നിയമപ്രകാരം കേസെടുക്കുക ആയിരുന്നു.
വിവാഹം നടത്തിക്കൊടുത്ത ക്ഷേത്രപൂജാരി, വരന്, ഇവരുടെ മാതാപിതാക്കള് എന്നിവര്ക്കെതിരെയാണ് കേസ്. സെപ്റ്റംബര് ഒന്പതിനാണ് കേസിനാസ്പദമായ സംഭവം. ദേവികുളം സ്വദേശിനിയായ പതിനേഴുകാരിയും ബൈസണ്വാലി സ്വദേശിയായ യുവാവും തമ്മിലുള്ള വിവാഹമാണ് നടത്തിയത്. ശിശുവികസന വകുപ്പ് ഉദ്യോഗസ്ഥര് ഈ വിവരം രാജാക്കാട്, ദേവികുളം പോലീസ് സ്റ്റേഷനുകളിലേക്ക് കൈമാറി. എന്നാല് പോലീസ് സ്ഥലത്ത് എത്തുന്നതിനു മുന്പ് വിവാഹം നടന്നു. പ്രതികളെ അടിമാലി കോടതിയില് ഹാജരാക്കി.