റാന്നി : പമ്പാനദിയില് കുളിക്കാനിറങ്ങിയ ഒഴുക്കില്പെട്ടു കാണാതായ വിദ്യാര്ത്ഥിയുടെ മൃതദേഹം ലഭിച്ചു. തീയാടിക്കല് സ്വദേശിയും പ്ലാങ്കമണ് വട്ടമലയില് വാടകയ്ക്കു താമസിക്കുന്ന ചെളിക്കുഴിയില് ബിജു-അന്നമ്മ ദമ്പതികളുടെ മകന് വിപിന് ബിജു(18)വാണ് ഒഴുക്കില്പെട്ടു മരിച്ചത്. ഇന്നലെ ഉച്ചയോടെ കടവില് തന്നെ ചെളിയില് പുതഞ്ഞ നിലയിലാണ് മൃതദേഹം കിട്ടിയത്.
ശനിയാഴ്ച വൈകീട്ട് ആറോടെ ഇടപ്പാവൂര് പുത്തൂര് കടവിലായിരുന്നു സംഭവം. ബന്ധുക്കള്ക്കും സുഹൃത്തുക്കള്ക്കും ഒപ്പം കുളിക്കാനെത്തി ഒഴുക്കില്പെടുകയായിരുന്നു. പേരൂര്ച്ചാല് പാലത്തിനു സമീപം ഇരുചക്ര വാഹനങ്ങല് വെച്ച ശേഷം നദി കരയിലൂടെ നടന്നെത്തി പുത്തൂര് കടവില് കുളിക്കാനിറങ്ങുകയായിരുന്നു. റാന്നിയില് നിന്നും അഗ്നിശമന സേനയും നാട്ടുകാരും കോയിപ്രം പോലീസും സ്ഥലത്തെത്തി തെരച്ചില് നടത്തിയിരുന്നു.
