കോഴിക്കോട്: ജോസ്.കെ മാണിയെക്കൊണ്ട് ലവ് ജിഹാദിനെക്കുറിച്ച് പറയിക്കുന്നത് പിണറായി വിജയനാണെന്ന് മുസ്ലിം ലീഗ് നേതാവ് ഡോ. എം.കെ. മുനീര്. മുസ്ലിം, ക്രിസ്ത്യന് സമുദായങ്ങളില് ആശയക്കുഴപ്പമുണ്ടാക്കാനും അവരുടെ സൗഹൃദം തകര്ക്കാനുമാണിത്.
ബംഗാളില് മാത്രല്ല, കേരളത്തിലും സി.പി.എമ്മിന്റെ നിറം കാവിയാവുകയാണ്. കേരളത്തെ ഇല്ലാതാക്കാനാണ് സി.പി.എമ്മും ആര്.എസ്.എസും കൈകോര്ത്ത് പിടിക്കുന്നത്. ആര്.എസ്.എസ്-സി.പി.എം ബന്ധം എത്രയോ കാലമായി ഉള്ളതാണെന്നും മുനീര് ആരോപിച്ചു.
ലവ് ജിഹാദ് സാമൂഹിക പ്രശ്നമാണെന്നും ഇക്കാര്യത്തില് ചില കേസുകള് അഭിസംബോധന ചെയ്യപ്പെടേണ്ടതാണെന്നും ഇടതുമുന്നണിയിലെ ഘടകകക്ഷിയായ കേരള കോണ്ഗ്രസ് -എമ്മിന്റെ നേതാവും പാലായിലെ എല്.ഡി.എഫ് സ്ഥാനാര്ഥിയുമായ ജോസ് കെ. മാണി ദ പ്രിന്റ് ഓണ്ലൈന് പോര്ട്ടലിന് നല്കിയ അഭിമുഖത്തില് അഭിപ്രായപ്പെട്ടിരുന്നു. തങ്ങളുടെ പാര്ട്ടി അവ അഡ്രസ് ചെയ്യുമെന്നും ഇതുപോലുള്ളവ സംഭവിക്കുന്നുണ്ടെങ്കില് അത് മുഖവിലക്കെടുക്കേണ്ടതു തന്നെയാണെന്നും ജോസ് കെ.മാണി പറഞ്ഞു. പിന്നീട് കേരളത്തിലെ ചാനല് അഭിമുഖത്തില് ഇക്കാര്യം അടിവരയിട്ട് സംസാരിച്ചു. ‘ലവ് ജിഹാദ് പ്രശ്നം പരിശോധിക്കണം. അതില് പ്രശ്നങ്ങളുണ്ടെങ്കില് അഡ്രസ് ചെയ്യണം. വിഷയം വീണ്ടും ജനസമൂഹത്തില് വന്നിട്ടുണ്ടെങ്കില് അതെന്തുകൊണ്ടാണെന്ന് പഠിക്കണം. സഭ ഇത്തരം വിഷയത്തില് ഇടപെടാറില്ല. പൊതുസമൂഹത്തില് വിഷയം ഉയര്ന്നുവരുന്നുണ്ട്. വിഷയം ഉണ്ടോ ഇല്ലയോ എന്ന സംശയം ദുരീകരിക്കണം.’-ജോസ് ചൂണ്ടിക്കാട്ടി.
ഇടതുമുന്നണിയിലെ മുഖ്യഘടകകക്ഷികളിലൊന്നായ സി.പി.ഐയുടെ സംസ്ഥാന സെക്രട്ടറി കാനം രാജേന്ദ്രന് ഉള്പ്പെടെ ജോസിന്റെ വിവാദ പ്രസ്താവനയെ തള്ളിപ്പറഞ്ഞ് രംഗത്തെത്തിയതോടെ ഇത്തരം കാര്യങ്ങളല്ല ചര്ച്ചയാകേണ്ടതെന്നും ലവ് ജിഹാദ് വിഷയത്തില് തനിക്ക് ഇടതുമുന്നണിയുടെ നിലപാടാണെന്നും ജോസ് മലക്കംമറിയുകയായിരുന്നു.
