കോഴിക്കോട് : ഇന്സ്റ്റഗ്രാമില് വൈറലായ ‘കുട്ടി സഖാവ്’ എന്ന അക്കൗണ്ട് മെറ്റ സസ്പെൻഡ് ചെയ്തതിനെ വിമർശിച്ച് പി എ മുഹമ്മദ് റിയാസ് എംഎൽഎ. അക്കൗണ്ട് സസ്പെൻഡ് ചെയ്തതിൽ വ്യക്തമായ വിശദീകരണം മെറ്റ നൽകണമെന്ന് അദ്ദേഹം ആവശ്യപ്പെട്ടു. സോഷ്യൽ മീഡിയയിലെ രാഷ്ട്രീയ അഭിപ്രായ സ്വാതന്ത്ര്യം ഒരു സർക്കാരിന്റെയും ഇഷ്ടാനിഷ്ടങ്ങൾക്ക് അനുസരിച്ച് നിയന്ത്രിക്കപ്പെടരുത് എന്നും ഫേസ്ബുക്കിൽ പങ്കുവെച്ച പോസ്റ്റിൽ മുഹമ്മദ് റിയാസ് എംഎൽഎ വ്യക്തമാക്കി.
സിപിഐഎമ്മിനെ ഇഷ്ടപ്പെടുന്നവർക്ക് ആവേശം നൽകുന്ന വീഡിയോകൾ സോഷ്യൽ മീഡിയയിൽ വേണ്ടെന്ന യുഡിഎഫ് സർക്കാരിന്റെ ആഗ്രഹം മെറ്റ നടപ്പിലാക്കുന്ന സ്ഥിതി ഉണ്ടാകരുത്. മലപ്പുറം ജില്ലയിലെ തിരൂർ ഹെൽത്ത് സെന്റർ യൂണിറ്റിലെ ബാലസംഘം കൂട്ടുകാർ പോസ്റ്റ് ചെയ്ത 25 ലക്ഷത്തിലധികം പേർ കണ്ട കുട്ടികളുടെ ഹൃദയസ്പർശിയായ ഒരു വീഡിയോയ്ക്ക് പിന്നാലെ ‘കുട്ടി സഖാവ്’ എന്ന ഇൻസ്റ്റഗ്രാം അക്കൗണ്ട് സസ്പെൻഡ് ചെയ്തതിൽ മെറ്റ വ്യക്തമായ വിശദീകരണം നൽകണം. സോഷ്യൽ മീഡിയയിലെ രാഷ്ട്രീയ അഭിപ്രായ സ്വാതന്ത്ര്യം ഒരു സർക്കാരിന്റെയും ഇഷ്ടാനിഷ്ടങ്ങൾക്ക് അനുസരിച്ച് നിയന്ത്രിക്കപ്പെടരുത്, മുഹമ്മദ് റിയാസ് എംഎൽഎ കുറിച്ചു.
