കല്ലടിക്കോട്: മൊബൈല്‍ കട കുത്തിത്തുറന്ന് ആറ് സ്മാര്‍ട്ട് ഫോണുകള്‍ കവര്‍ന്ന കേസില്‍ യുവാവ് അറസ്റ്റില്‍.
കാരാകുര്‍ശ്ശി സ്വദേശി കണക്കുംപുള്ളി മുഹമ്മദ് ഹസ്സന്‍ ഹുസൈന്‍ നാണ് (22) പിടിയിലായത്. തച്ചമ്പാറ ടൗണില്‍ ആണ് സംഭവം. കുമരംപുത്തൂരില്‍ മൊബൈല്‍ ഫോണ്‍ വില്‍പന നടത്താന്‍ ശ്രമിക്കുന്നതിനിടയിലാണ് ഇയാള്‍ പിടിയിലാകുന്നത്. തച്ചമ്പാറ മുഹമ്മദ് നിസാറിന്‍റെ ഉടമസ്ഥതയിലുള്ള മൊബൈല്‍ ഫോണ്‍ കടയുടെ പൂട്ടുപൊളിച്ചാണ് ഇയാള്‍ അകത്തു കടന്നത്.
തിങ്കളാഴ്ച രാവിലെ ഉടമ കട തുറക്കാനെത്തിയപ്പോഴാണ് മോഷണം ശ്രദ്ധയില്‍പെട്ടത്. ഉടനെ പോലീസില്‍ പരാതി നല്‍കുകയായിരുന്നു. കാഞ്ഞിരപ്പുഴ മൊബൈല്‍ ഫോണ്‍ ഡീലേഴ്സ് അസോസിയേഷന്‍റെ ഇടപെടലില്‍ ആണ് പ്രതിയെ പിടികൂടിയത്. ഡിവൈ.എസ്.പി വി.എ. കൃഷ്ണദാസ്, സി.ഐ ടി. ശശികുമാര്‍, എസ്.ഐ കെ.പി. അബ്ദുല്‍ സത്താര്‍, സി.പി.ഒമാരായ വിമല്‍ കുമാര്‍, കൃഷ്ണദാസ്, സൈനുദ്ദീന്‍ എന്നിവരടങ്ങിയ സംഘമാണ് പ്രതിയെ പിടികൂടിയത്. പ്രതിയെ കോടതിയില്‍ ഹാജരാക്കി.
