കോഴിക്കോട് : ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തിയ മോഡല്‍ ഷഹനയുടെ ഭര്‍ത്താവ് ലഹരിക്ക് അടിമയാണെന്ന് പോലീസ്. ഫുഡ് ഡെലിവറിയുടെ മറവിലാണ് സജാദ് ലഹരിക്കച്ചവടം നടത്തിയിരുന്നത്. ഇവരുടെ വീട്ടില്‍ നിരവധി ലഹരി വസ്തുക്കള്‍ പോലീസ് ഇന്നലെ തന്നെ കണ്ടെടുത്തിരുന്നു. ഷഹനയെ മര്‍ദ്ദിച്ചിരുന്നുവെന്ന കാര്യവും സജാദ് സമ്മതിച്ചു. പണം ചോദിച്ചാണ് മര്‍ദ്ദിച്ചിരുന്നത്. കഞ്ചാവ്, എംഡിഎംഎ തുടങ്ങിയ ലഹരികള്‍ സജാദ് ഉപയോഗിച്ചിരുന്നു. കഞ്ചാവ് ഉപയോഗിക്കുന്നതിനുള്ള ഇന്‍ഹേലറുകളും മറ്റും വീട്ടില്‍ നിന്ന് പോലീസ് കണ്ടെടുത്തിട്ടുണ്ട്.
അതേസമയം ഷഹനയുടേയത് ആത്മഹത്യയാണോ എന്ന് ഉറപ്പിക്കാന്‍ വീട്ടില്‍ ഇന്ന് ശാസ്ത്രീയ പരിശോധന നടത്തും. ഷഹനയുടെ ദേഹത്തും മര്‍ദ്ദനമേറ്റതിന്റെ നിരവധി പാടുകളുണ്ട്. ജനലിന്റെ അഴിയില്‍ ഷഹന തൂങ്ങിമരിച്ചതാണെന്നാണ് സജാദ് പോലീസിനോട് പറഞ്ഞത്. സജാദിനെ ഈ വീട്ടില്‍ എത്തിച്ച്‌ പോലീസ് തെളിവെടുപ്പ് നടത്തിയിരുന്നു. ഇയാളെ ഇന്ന് കോടതിയില്‍ ഹാജരാക്കും. ഷഹനയുടെ മൃതദേഹം പോസ്റ്റ്‌മോര്‍ട്ടം നടപടികള്‍ക്ക് ശേഷം ഇന്നലെ രാത്രി കബറടക്കി.
