ദില്ലി: ഗുജറാത്തില് തുടര്ച്ചയായി ഏഴാം തവണയും ബിജെപി അധികാരത്തിലേക്ക്. മികച്ച വിജയം കൈവരിച്ച ടീം ഗുജറാത്തിനെ പ്രധാനമന്ത്രി നരേന്ദ്രമോദി അഭിനന്ദിച്ചു. ഗുജറാത്ത് ബി ജെ പി അധ്യക്ഷന് സി ആര് പാട്ടീലിനെയും ഗുജറാത്ത് മുഖ്യമന്ത്രി ഭൂപേന്ദ്ര പട്ടേലിനേയും വിളിച്ചാണ് പ്രധാനമന്ത്രി അഭിനന്ദനം അറിയിച്ചത്. അതേസമയം, വൈകീട്ട് ആറ് മണിക്ക് പ്രധാനമന്ത്രി ബിജെപി ആസ്ഥാനത്ത് അഭിസംബോധന ചെയ്യും എന്നാണ് വിവരം.
താമരത്തരംഗം ആഞ്ഞടിച്ച ഗുജറാത്തില് ചരിത്രത്തിലെ മികച്ച പ്രകടനവുമായി ബിജെപി കാഴ്ച്ചവെച്ചത്. പോള് ചെയ്ത വോട്ടിന്റെ 53 ശതമാനവും കയ്യടക്കിയ ബിജെപി 182 സീറ്റില് 152 ലും വ്യക്തമായ ലീഡ് നേടി. 13 ശതമാനം വോട്ടും 6 സീറ്റുകളുമായി ആം ആദ്മി പാര്ട്ടി സാന്നിധ്യമറിയിച്ച ഗുജറാത്തില് കോണ്ഗ്രസ് തകര്ന്ന് തരിപ്പണമായി. വോട്ട് ശതമാനത്തിലും സീറ്റെണ്ണത്തിലും തകര്ന്നടിഞ്ഞ കോണ്ഗ്രസ് 20 സീറ്റില് ഒതുങ്ങി.
എക്സിറ്റ് പോള് ഫലങ്ങള് പ്രവചിച്ചത് പോലെ ബിജെപിക്ക് വന് വിജയത്തിലേക്ക് നീങ്ങുമ്ബോള് കോണ്ഗ്രസ് ബഹുദൂരം പിന്നിലാണ്. 2017 ല് 77 സീറ്റ് നേടിയ ഇടത്ത് നിന്നാണ് കോണ്ഗ്രസിന് ഇത്തരമൊരു വീഴ്ച പറ്റിയിരിക്കുന്നത്. ആം ആദ്മിയുടെ തെരഞ്ഞെടുപ്പ് പ്രചാരണം വലിയ തോതില് ബാധിച്ചത് കോണ്ഗ്രസിനെയാണ്. ഗുജറാത്തില് ബിജെപിക്ക് വെല്ലുവിളിയാകാന് പോലും കോണ്ഗ്രസിനോ ആംആദ്മി പാര്ട്ടിക്കോ സാധിച്ചിട്ടില്ല.
ഭാരത് ജോഡോ യാത്രയുമായി രാഹുല് ഗാന്ധി ഇറങ്ങിയിരുന്നെങ്കിലും ഗുജറാത്തില് വേണ്ട വിധം പ്രചാരണം നടത്താന് കോണ്ഗ്രസിന് കഴിഞ്ഞിരുന്നില്ല. ഗുജറാത്തില് കോണ്ഗ്രസ് തകര്ന്നടിഞ്ഞെന്ന് പറയാനാവില്ലെന്ന് കോണ്ഗ്രസ് നേതാവ് മുകുള് വാസ്നിക്. ചില മേഖലകളില് തിരിച്ചടിയുണ്ടായെന്നും എന്നാല് ഇക്കാരണത്താല് കോണ്ഗ്രസ് തകര്ന്നടിഞ്ഞുവെന്ന് പറയാനാകില്ലെന്നും മുകുള് വാസ്നിക് പറഞ്ഞു.
