ആലുവ : നിയമവിദ്യാര്ത്ഥിനി മോഫിയ പര്വീണിന്റെ ആത്മഹത്യയില് ഡിജിറ്റല് തെളിവുകളുടെ ശാസ്ത്രീയ പരിശോധനാ ഫലം കൂടി ഉള്പ്പെടുത്തി കുറ്റപത്രം സമര്പ്പിക്കും. ഈ മാസം തന്നെ കുറ്റപത്രം സമര്പ്പിക്കുമെന്നാണ് സൂചന. ഡിജിറ്റല് തെളിവുകളുടെ ശാസ്ത്രീയ പരിശോധന പൂര്ത്തിയാകാന് കാത്തിരിക്കുകയാണെന്ന് അന്വേഷണ സംഘം അറിയിച്ചു.
അതേസമയം കോടതിയുടെ മേല്നോട്ടത്തില് കേസ് നടപടികള് വേണമെന്നാണ് മോഫിയയുടെ കുടുംബത്തിന്റെ ആവശ്യം.
ഭര്ത്താവ് മുഹമ്മദ് സുഹൈലിന്റെ ക്രിമിനല് പശ്ചാത്തലം കോടതിയുടെ മേല്നോട്ടത്തില് അന്വേഷിക്കണമെന്നും സിഐ സുധീറിനെ സ്വാധീനിച്ച രാഷട്രീയ ശക്തികളെ വെളിച്ചത്ത് കൊണ്ടുവരണമെന്നും കുടുംബം ആവശ്യപ്പെടുന്നു. ഇതിനായി വിചാരണാ കോടതിയില് ഹര്ജി നല്കാനാണ് കുടുംബത്തിന്റെ നീക്കം. എടയപ്പുറം സ്വദേശി മോഫിയ പര്വിനെ (21) നവംബര് 24 ന് രാവിലെയാണ് തൂങ്ങി മരിച്ച നിലയില് കണ്ടെത്തിയത്. ഭര്തൃവീട്ടുകാര്ക്കെതിരെ പോലീസില് പരാതി നല്കിയതിന് പിന്നാലെയാണ് യുവതി തൂങ്ങി മരിച്ചത്.
