കൊച്ചി : ഒരിടവേളയ്ക്ക് ശേഷം മോഹന്ലാലിന്റേതായി തിയറ്ററുകളില് കൈയടി നേടിയ ചിത്രമായിരുന്നു നേര്. ജീത്തു ജോസഫിന്റെ സംവിധാനത്തിലെത്തിയ കോര്ട്ട് റൂം ഡ്രാമയില് വിജയമോഹന് എന്ന അഭിഭാഷകനായാണ് മോഹന്ലാല് എത്തിയത്. ക്രിസ്മസ് റിലീസ് ആയി ഡിസംബര് 21 ന് തിയറ്ററുകളിലെത്തിയ ചിത്രം 100 കോടി നേടിയതായി നിര്മ്മാതാക്കളായ ആശിര്വാദ് സിനിമാസ് അറിയിച്ചിരുന്നു. ഇപ്പോൾ ഇതാ ചിത്രത്തിന്റെ ഒടിടി സ്ട്രീമിംഗ് ആരംഭിച്ചിരിക്കുകയാണ്.
പ്രമുഖ പ്ലാറ്റ്ഫോം ആയ ഡിസ്നി പ്ലസ് ഹോട്ട്സ്റ്റാറിലൂടെയാണ് ചിത്രം എത്തിയിരിക്കുന്നത്. മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി ഭാഷകളിലും ഹോട്ട്സ്റ്റാറിലൂടെ ചിത്രം കാണാനാവും. ചിത്രത്തിന്റെ രചന നിര്വ്വഹിച്ചിരിക്കുന്നത് അഭിഭാഷകയും നടിയുമായ ശാന്തി മായാദേവിയും ജീത്തു ജോസഫും ചേര്ന്നാണ്. ഏറെക്കാലത്തിന് ശേഷമാണ് മോഹന്ലാല് ബിഗ് സ്ക്രീനില് അഭിഭാഷക കഥാപാത്രമായി എത്തുന്നത്. ആശിര്വാദ് സിനിമാസിന്റെ ബാനറില് ആന്റണി പെരുമ്പാവൂര് ആണ് ചിത്രത്തിന്റെ നിര്മ്മാണം. ചിത്രത്തിന്റെ ഛായാഗ്രഹണം സതീഷ് കുറുപ്പ് ആണ്. എഡിറ്റിംഗ് വി എസ് വിനായക്, സംഗീതം വിഷ്ണു ശ്യാം, കലാസംവിധാനം ബോബന്, ചീഫ് അസോസിയേറ്റ് ഡയറക്ടര് സുധീഷ് രാമചന്ദ്രന്, ഡിസൈന് സേതു ശിവാനന്ദന്.
