കോട്ടയം : നഗരമധ്യത്തിലെ ലോഡ്ജ് മുറിയില്നിന്ന് ലക്ഷങ്ങൾ കവര്ന്നു. ഗുഡ്ഷെപ്പേര്ഡ് റോഡിലെ തെക്കനാട്ട് ലോഡ്ജിലെ മുറിയില് സൂക്ഷിച്ചിരുന്ന 1.83 ലക്ഷം രൂപയാണ് നഷ്ടമായത്. സംഭവവുമായി ബന്ധപ്പെട്ട് ലോഡ്ജിലെ ജീവനക്കാരനായി അന്വേഷണം തുടങ്ങി. ഇയാളുടെ ചിത്രവും കോട്ടയം ഈസ്റ്റ് പോലീസ് പുറത്തു വിട്ടു.
മാവേലിക്കര എണ്ണക്കാട് രംഗം വീട്ടില് ശ്യാം നായരെന്നാണ് ഇയാള് ലോഡ്ജില് ജോലിക്കായി നല്കിയിരുന്ന വിലാസം. തെളിവായി നല്കിയ പാസ്പോര്ട്ടിലും ഇതേ വിലാസമാണ്. എന്നാല്, ഈ വിലാസം വ്യാജമാണെന്ന് കണ്ടെത്തിയ പോലീസ്, പ്രതിയെ തിരിച്ചറിയുന്നതിനാണ് ചിത്രം പുറത്ത് വിട്ടത്. കഴിഞ്ഞ ദിവസമായിരുന്നു കേസിനാസ്പദമായ സംഭവം. കോട്ടയം നാഗമ്ബടത്ത് നടന്നുവരുന്ന പുഷ്പമേളയുടെ നടത്തിപ്പുകാരാണ് പരാതിക്കാര്.
പുഷ്പമേളയിലെ സ്റ്റാളുകളില് നിന്നുള്ള വാടക ദിവസവും വൈകീട്ട് നടത്തിപ്പുകാര് പിരിച്ചിരുന്നു. ഈ തുക ലോഡ്ജിലാണ് സൂക്ഷിച്ചിരുന്നത്. ലോഡ്ജ് ഉടമയുടെ ഉടമസ്ഥതയിലുള്ള പെയിന്റ് കടയുടെ സ്റ്റാളും ഇതിലുണ്ടായിരുന്നു. പ്രതിയെന്ന് സംശയിക്കുന്നയാള് ഈ സ്റ്റാളില് ജോലി ചെയ്തിരുന്നു. കഴിഞ്ഞദിവസം മുറി വൃത്തിയാക്കുന്നതിനായി താക്കോല് ഇയാളെ ഏല്പ്പിച്ചു. പിന്നാലെയാണ് പണം നഷ്ടമായെന്ന് വ്യക്തമായത്. ഇയാള് നിരവധി ക്രിമിനല്ക്കേസില് പ്രതിയാണെന്നും പോലീസ് സംശയിക്കുന്നുണ്ട്.