കൊല്ലം: കെഎസ്ആര്ടിസി ബസില് തമിഴ്നാട്ടില് നിന്നും കേരളത്തിലേക്ക് കൊണ്ടുവന്ന മതിയായ രേഖകളില്ലാത്ത 27 ലക്ഷം രൂപ ആര്യങ്കാവ് ചെക്ക്പോസ്റ്റില് എക്സൈസ് അധികൃതര് പിടികൂടി.
KL 15 A 2011 എന്ന നമ്പറിലുള്ള തെങ്കാശി തിരുവനന്തപുരം കെഎസ്ആര്ടിസി ഫാസ്റ്റ് പാസഞ്ചര് ബസ്സിലാണ് പണം കൊണ്ടുവന്നത്. തമിഴ്നാട് കടയനല്ലൂര് സ്വദേശി മുഹമ്മദ് അക്രം ആണ് പിടിയിലായത്. പണം ബാഗില് ഒളിപ്പിച്ച നിലയിലായിരുന്നു. തിരുവനന്തപുരത്തുനിന്നും പഴയ സ്വര്ണം വാങ്ങാനാണ് പണം കൊണ്ടുവന്നത് എന്നാണ് പിടിയിലായ മുഹമ്മദ് അക്രം എക്സൈസിന് നല്കിയ മറുപടി.എന്നാല് മതിയായ രേഖകള് ഇല്ലാത്തതിനാല് കൂടുതല് പരിശോധനയ്ക്കായി എക്സൈസ് അധികൃതര് പിടികൂടിയ പണവും പ്രതിയെയും തെന്മല പോലീസിന് കൈമാറി.
