കൊച്ചി : മോന്സന് മാവുങ്കിലന്റെ പുരാവസ്തു തട്ടിപ്പടക്കമുള്ള കേസുകളില് ഐജി ലക്ഷ്മണയടക്കമുളളവരെ പ്രതി ചേര്ക്കണമെന്നാവശ്യപ്പെട്ടുളള ഹര്ജിയില് ക്രൈംബ്രാഞ്ച് ഹൈക്കോടതിയില് റിപ്പോര്ട്ട് സമര്പ്പിച്ചു. ഉന്നത പോലീസ് ഉദ്യോഗസ്ഥര്ക്ക് തട്ടിപ്പില് നേരിട്ട് പങ്കുളളതായി തെളിവില്ലെന്ന് റിപ്പോര്ട്ടില് പറയുന്നു. ഉദ്യോഗസ്ഥര് മോന്സന് മാവുങ്കലില് നിന്ന് പണം വാങ്ങിയത് കടമായിട്ടാണ്. പോലീസ് ചട്ടങ്ങള്ക്ക് വിരുദ്ധമായി ആരോപണവിധേയനായ ഉദ്യോഗസ്ഥര് മോന്സനുമായി അടുപ്പം പുലര്ത്തി.
ക്രൈംബ്രാഞ്ച് മുന് ഡിഐജി എസ് സുരേന്ദ്രനും കുടുംബത്തിനും മോന്സനുമായി വലിയ അടുപ്പമുണ്ടായിരുന്നു. എന്നാല് തട്ടിപ്പില് പ്രതിയാക്കാന് തെളിവില്ല. അതിനാലാണ് സസ്പെന്ഷനും വകുപ്പുതല അന്വേഷണവും തുടരുന്നത്. മോന്സന്റെ കൊച്ചിയിലെ വീട്ടില് പട്രോളിങ് ബുക്ക് വെച്ചത് സാധാരണ നടപടി മാത്രമാണ്. കെപിസിസി പ്രസിഡന്റ് കെ സുധാകരനെതിരെ അന്വേഷണം തുടരുകയാണെന്നും ക്രൈംബ്രാഞ്ച് റിപ്പോര്ട്ടില് പറയുന്നു. സുധാകരന്റെ സാന്നിധ്യത്തിലാണ് പരാതിക്കാരനായ അനൂപ് 25 ലക്ഷം രൂപ മോന്സന് കൈമാറിയത്. സുധാകരനെ ചോദ്യം ചെയ്യാനായിട്ടില്ലെന്നും ക്രൈംബ്രാഞ്ച് റിപ്പോര്ട്ടിലുണ്ട്.