കോഴിക്കോട്: സംസ്ഥാനത്ത് കാലവർഷം ശക്തമാകുന്ന സാഹചര്യത്തിൽ സുരക്ഷാ മുൻകരുതലിന്റെ ഭാഗമായി താമരശ്ശേരി ചുരത്തിൽ വൻ ഗതാഗത നിയന്ത്രണം ഏർപ്പെടുത്തി ജില്ലാ കളക്ടർ ഡി.ആർ മേഘശ്രീ. മൾട്ടി ആക്സിൽ വാഹനങ്ങൾ, ഹെവി ഗുഡ്സ് വാഹനങ്ങൾ, ആർട്ടിക്കുലേറ്റഡ് ലോറികൾ എന്നിവയ്ക്ക് രാവിലെ 6 മുതൽ രാത്രി 8 വരെ ചുരത്തിലൂടെയുള്ള പ്രവേശനത്തിന് നിരോധനമുണ്ട്. മഴക്കാലം കഴിയുന്നത് വരെ ഈ ഉത്തരവ് പ്രാബല്യത്തിലുണ്ടാകും.
കെ.എസ്.ആർ.ടി.സി ബസുകൾ, ടാക്സികൾ ഉൾപ്പെടെയുള്ള ലൈറ്റ് മോട്ടോർ വാഹനങ്ങൾ, ആംബുലൻസുകൾ, അവശ്യ സേവന വാഹനങ്ങൾ, പൊലീസ്, ഫയർഫോഴ്സ്, സൈന്യം എന്നിവയെ നിരോധനത്തിൽ നിന്ന് ഒഴിവാക്കിയിട്ടുണ്ട്. നിയന്ത്രണം ലംഘിക്കുന്നവർക്കെതിരെ ദുരന്ത നിവാരണ നിയമപ്രകാരം കർശന നടപടികൾ സ്വീകരിക്കും. സാഹചര്യങ്ങൾ വിലയിരുത്തി ആവശ്യമായ സമയങ്ങളിൽ നിയന്ത്രണങ്ങളിൽ മാറ്റം വരുത്തുമെന്ന് അധികൃതർ അറിയിച്ചു.
