പത്തനംതിട്ട : ജില്ലയുടെ കിഴക്കന് മേഖലകളിലും ഡാമുകളുടെ വൃഷ്ടി പ്രദേശങ്ങളിലും അതിശക്തമായ മഴയുള്ളതിനാല് മൂഴിയാര് അണക്കെട്ടിലെ ജലനിരപ്പ് ഉയര്ന്നുകൊണ്ടിരിക്കുകയാണ്. ശക്തമായ മഴ ഇതേരീതിയില് തുടരുകയാണെങ്കില് ജലനിരപ്പ് 192.63 മീറ്റര് എത്തുമ്പോള് ഇന്ന് (ആഗസ്റ്റ് 6 വ്യാഴം) വൈകുന്നേരം 7 മണിയോടുകൂടി മൂഴിയാര് ഡാമിന്റെ മൂന്നു ഷട്ടറുകള് 30 സെന്റീ മീറ്റര് വീതം ഉയര്ത്തി 51.36 ക്യൂമെക്സ് നിരക്കില് ജലം കക്കാട്ട് ആറിലേക്ക് ഒഴുക്കി വിടും. ഇപ്രകാരം ഷട്ടറുകള് ഉയര്ത്തുന്നത് മൂലം കക്കാട്ടാറില് ആങ്ങമൂഴി, സീതത്തോട് വരെയുളള പ്രദേശങ്ങളില് 50 സെന്റീ മീറ്റര് വരെ ജലനിരപ്പ് ഉയരുവാന് സാധ്യതയുണ്ട്. ഈ സാഹചര്യത്തില് കക്കാട്ടാറിന്റെയും ,പമ്പയാറിന്റെയും തീരത്ത് താമസിക്കുന്നവരും ആങ്ങമൂഴി, സീതത്തോട്, ചിറ്റാര്, മണിയാര്, പെരുനാട്, വടശേരിക്കര, റാന്നി, കോഴഞ്ചേരി, ആറന്മുള നിവാസികളും പൊതുജനങ്ങളും ജാഗ്രതാ പുലര്ത്തണമെന്നും നദികളില് ഇറങ്ങുന്നത് ഒഴിവാക്കണമെന്നും ജില്ലാ കളക്ടര് അറിയിച്ചു.
