തിരുവനന്തപുരം: സംസ്ഥാനത്ത് വീണ്ടും കൊവിഡ് നിയന്ത്രണങ്ങള് കര്ശനമാക്കി. പൊതുപരിപാടികളില് അമ്പത് മുതല് നൂറു പേര് മാത്രമേ പങ്കെടുക്കാന് പാടുളളൂ. മാളുകളില് പ്രവേശനത്തിന് ആര്ടിപിസിആര് ടെസ്റ്റ് നടത്തി നെഗറ്റീവ് സര്ട്ടിഫിക്കറ്റ് ഉണ്ടായിരിക്കണം. വാക്സിന് രണ്ട് ഡോസ് എടുത്തവര്ക്കും മാളുകളില് പ്രവേശിക്കാം.
രണ്ടരലക്ഷം പേര്ക്ക് നാളെയും മറ്റന്നാളുമായി കൊവിഡ് പരിശോധന നടത്താനും തീരുമാനിച്ചു. സംസ്ഥാനത്ത് കൂടുതല് വാക്സിന് എത്തിക്കണമെന്ന് കേന്ദ്ര സര്ക്കാരിനോട് ആവശ്യപ്പെടാനും മുഖ്യമന്ത്രിയുടെ അധ്യക്ഷതയില് ചേര്ന്ന ഓണ്ലൈന് യോഗത്തില് തീരുമാനമായി. വാക്സിന് കിട്ടുന്ന മുറയ്ക്ക് മെഗാ വാക്സിനേഷന് ക്യാമ്പുകള് വിപുലീകരിക്കും. ഒരു ദിവസം രണ്ടര ലക്ഷം വരെ പേര്ക്ക് വാക്സിന് നല്കാന് തീരുമാനമായിട്ടുണ്ട്.
സംസ്ഥാനത്തെ ആശുപത്രികളിലെ തീവ്രപരിചരണ വിഭാഗങ്ങളില് കൂടുതല് കിടക്കകള് സജ്ജീകരിക്കാനും ധാരണയായി. പ്രാദേശിക തലത്തില് 144 പ്രഖ്യാപിക്കാനുളള അനുമതി ജില്ലാ കളക്ടര്മാര്ക്ക് ഇതിനകം നല്കിയിട്ടുണ്ട്.