പത്തനംതിട്ട : സാമൂഹ്യ പ്രവർത്തക ഡോ. എം. എസ്. സുനിൽ ഭവന രഹിതർക്കു പണിതു നൽകുന്ന 159-മത്തേയും 160- മത്തെയും വീടുകളുടെ ഉദ്ഘാടനവും താക്കോൽദാനവും നടന്നു . ഉറുകുന്നു പാണ്ടവൻ പാറയുടെ അടിവാരത്തു ആരോരും സഹായത്തിനില്ലാതെ ചോർന്നൊലിക്കുന്ന കുടിലുകളിൽ കഴിയുകയായിരുന്ന വിധവയായ മേരിക്കുട്ടിയുടെയും ജിൻസിയുടെയും കുടുംബങ്ങളുടെ അവസ്ഥ നേരിൽ കാണുവാൻ ഇടയായ ടീച്ചർ ഷിക്കാഗോ മലയാളി അസോസിയേഷന്റെ സഹായത്താൽ 2 വീടുകൾ ഇവർക്കായി നിർമിച്ചു നൽകുകയായിരുന്നു.
പാണ്ഡവൻ പാറ മേഘ ഭവനത്തിൽ മേരിക്കുട്ടി ഭർത്താവ് മരിച്ചു 2 പെൺ കുഞ്ഞുങ്ങളുമായി സുരക്ഷിതമല്ലാത്ത അവസ്ഥയിലായിരുന്നു ഷെഡിൽ കഴിഞ്ഞിരുന്നത്. മേരിക്കുട്ടിയുടെ വീടിന്റെ താക്കോൽ ദാനം അസോസിയേഷൻ അംഗം സണ്ണി ചിറയിൽ നിർവഹിച്ചു.
പാണ്ടവൻ പാറ സ്നേഹതീരം ജിൻസി തന്റെ രോഗിയായ ഭർത്താവ് ഗബ്രിയേലൂം 4 കുഞ്ഞുങ്ങളുമായി തകർന്ന ഒരു ഒറ്റ മുറി ഷെഡിലായിരുന്നു കഴിഞ്ഞിരുന്നത്. ഇവരുടെ വീടിന്റെ താക്കോൽ ദാനം അസോസിയേഷൻ അംഗം സാബു കട്ടപ്പുറം നിർവഹിച്ചു. രണ്ടു മുറികളും അടുക്കളയും ഹാളും ശുചിമുറിയും സിറ്റൗട്ടും അടങ്ങിയ 600 sq. Ft. വലുപ്പമുള്ള വീടുകളാണ് ഓരോന്നും. ചടങ്ങിൽ വാർഡ് മെമ്പർ ആരിഫ അഷറഫ്, കെ. പി. ജയലാൽ, മോസസ് സെബാസ്റ്റ്യൻ, ഹരിത കൃഷ്ണൻ എന്നിവർ പങ്കെടുത്തു.