കുണ്ടറ : മുളവനയില് രണ്ടുകടകള് കത്തിനശിച്ചു. മുളവന സ്കൂള് ജംഗ്ഷനില് പ്രവര്ത്തിക്കുന്ന ബാര്ബര്ഷോപ്പ്, നാടന് ഭക്ഷ്യവസ്തുക്കള് വില്ക്കുന്ന കട എന്നിവയാണ് കത്തിനശിച്ചത്. കഴിഞ്ഞദിവസം അര്ധരാത്രിയിലാണ് സംഭവം. അതുവഴി വന്ന യുവാക്കളാണ് കുണ്ടറ പോലീസിനെയും അഗ്നിരക്ഷാസേന വിഭാഗത്തെയും സംഭവം അറിയിച്ചത്. തുടര്ന്ന് പോലീസും രണ്ട് യൂണിറ്റ് അഗ്നിരക്ഷാ സേനയും സ്ഥലത്തെത്തി തീ അണയ്ക്കുകയായിരുന്നു.
തീ പടരും മുമ്പേ യുവാക്കളുടെ ശ്രമഫലമായി അഗ്നിരക്ഷാസേന സംഭവസ്ഥലത്തെത്തി തീയണച്ചതിനാല് സമീപത്തുള്ള മറ്റ് കടകള്ക്കും കെട്ടിടങ്ങള്ക്കും തീപിടിത്തത്തില് നിന്ന് രക്ഷപെടാനായി. അഗ്നിബാധമൂലം ഏഴ് ലക്ഷത്തോളം രൂപയുടെ നാശനഷ്ടം ഉണ്ടായതായി കണക്കാക്കപ്പെടുന്നു. മുളവനയിലെ ശ്രീശൈലത്ത് ശ്രീധരന്റേതാണ് ബാര്ബര്ഷാപ്പ്. പേരയം കൊച്ചുതുണ്ടില് ശ്രീധരന്പിള്ള എന്നയാളാണ് നാടന് ഭക്ഷ്യവസ്തുക്കള് വില്പന നടത്തുന്ന കടയുടെ ഉടമസ്ഥന്. സംഭവത്തില് കുണ്ടറ പോലീസ് കേസെടുത്ത് അന്വേഷണം ആരംഭിച്ചു.
