ഇടുക്കി : മുല്ലപ്പെരിയാര് ഡാമിലെ ജലനിരപ്പ് 137.6 അടിയായി തന്നെ തുടരുകയാണ്. അണക്കെട്ടിലെ ഷട്ടറുകള് തുറക്കുന്നതുമായി ബന്ധപ്പെട്ട് ഇന്നത്തെ സുപ്രീംകോടതിയുടെ തീരുമാനവും നിര്ണായകമാണ്. ഡാം തുറക്കേണ്ട സാഹചര്യം ഉണ്ടായാല് കൈക്കൊള്ളേണ്ട എല്ലാ നടപടികളും ഇടുക്കി ജില്ലാഭരണകൂടം സ്വീകരിച്ചിട്ടുണ്ട്.
ഡാമിലേക്കുള്ള നീരൊഴുക്കും മഴ മാറി നിന്നതോടെ കുറഞ്ഞിട്ടുണ്ട്. തമിഴ്നാട് കൊണ്ടുപോകുന്ന വെള്ളത്തിന്റെ അളവ് സെക്കന്ഡില് 2200 ഘനയടിയാണ്. അതേസമയം ഡാമിലെ ജലനിരപ്പ് 138 അടിയിലേക്ക് ഉയര്ന്നാല് സ്പില്വേയിലൂടെ വെള്ളം പുറത്തേക്കൊഴുക്കുമെന്ന് ഇന്നലെ ചേര്ന്ന ഉന്നതാധികാര സമിതിയോഗത്തില് തമിഴ്നാട് അറിയിച്ചു.
മുല്ലപ്പെരിയാറിലെ ജലനിരപ്പ് അടിയന്തിരമായി 137 അടിയായി നിലനിര്ത്തണമെന്ന് ഉന്നതതല സമിതി യോഗത്തില് കേരളം ആവശ്യപ്പെട്ടിരുന്നു. അണക്കെട്ടിലെ ജലനിരപ്പ് 142 അടിയായി നിജപ്പെടുത്തണമെന്ന തമിഴ്നാടിന്റെ ആവശ്യത്തോട് പ്രതികരിക്കുകയായിരുന്നു കേരളം.139.99 അടിയായി ജലനിരപ്പ് നിലനിര്ത്തണമെന്ന് 2018 ല് സുപ്രിംകോടതി നിര്ദേശിച്ചത് കേരളം ചൂണ്ടിക്കാട്ടി.