മുംബൈ: ലൈംഗിക തൊഴില് പൊതുസ്ഥലത്ത് മറ്റുളളവര്ക്കു ശല്യമാവുന്ന തരത്തില് ചെയ്യുമ്പോള് മാത്രമാണ് കുറ്റകൃത്യമാവുന്നതെന്ന് മുംബൈ അഡീഷനല് സെഷന്സ് കോടതി. ലെംഗിക തൊഴിലിന് പിടിക്കപ്പെട്ട മുപ്പത്തിനാലുകാരിയെ മോചിപ്പിക്കാന് ഉത്തരവിട്ടുകൊണ്ടാണ് കോടതിയുടെ നിരീക്ഷണം. ലെംഗിക തൊഴില് ചെയ്തതിന് പിടിയിലായ തന്നെ ഒരു വര്ഷത്തേക്കു ഷെല്ട്ടര് ഹോമില് പാര്പ്പിക്കാനുള്ള മജിസ്ട്രേറ്റ് കോടതിയുടെ ഉത്തരവ് ചോദ്യം ചെയ്താണ് യുവതി സെഷന്സ് കോടതിയെ സമീപിച്ചത്.
മുളുണ്ടില് നടന്ന റെയ്ഡിനിടെയാണ് യുവതി പിടിയിലായത്. ഇവരെ മസഗോണ് കോടതിയില് ഹാജരാക്കുകയും തുടര്ന്ന് ഷെല്ട്ടര് ഹോമിലേക്കു മാറ്റുകയുമായിരുന്നു. ഹര്ജിക്കാരി പ്രായപൂര്ത്തിയായ ആളാണെന്നും തൊഴില് ചെയ്തു ജീവിക്കാന് അവകാശമുണ്ടെന്നും സെഷന്സ് കോടതി ചൂണ്ടിക്കാട്ടി. ലൈംഗിക തൊഴില് നിയമപ്രകാരം കുറ്റകൃത്യമല്ല, പൊതു സ്ഥലത്ത് മറ്റുള്ളവര്ക്കു ശല്യമായ വിധത്തില് ചെയ്യുമ്പോള് മാത്രമാണ് അതു കുറ്റമാവുന്നത്. ഹര്ജിക്കാരി പൊതുസ്ഥലത്ത് ലൈംഗിക തൊഴില് ചെയ്തെന്ന ആക്ഷേപമില്ലെന്ന് കോടതി പറഞ്ഞു.