മുംബൈ : ആഡംബരക്കപ്പലിലെ ലഹരിമരുന്ന് കേസില്‍ നടന്‍ ഷാരൂഖ് ഖാന്റെ മകന്‍ ആര്യന് ഖാന് ക്ളീന്‍ ചിറ്റ്. ആര്യന് ഖാന് ഉള്‍പ്പടെ ആറുപേര്‍ക്കെതിരെ തെളിവില്ലെന്ന് നാര്‍കോട്ടിക്സ് കണ്‍ട്രോള്‍ ബ്യൂറോ (എന്‍സിബി) സമര്‍പ്പിച്ച കുറ്റപത്രത്തില്‍ വ്യക്തമാക്കി. ലഹരിമരുന്ന് കേസില്‍ 14 പേര്‍ക്കെതിരെയാണ് എന്‍സിബി കുറ്റപത്രം സമര്‍പ്പിച്ചത്. പത്ത് വാല്യങ്ങള്‍ അടങ്ങുന്നതാണ് കുറ്റപത്രം.
2021 ഒക്ടോബര്‍ രണ്ടിനാണ് ആഡംബര കപ്പലിലെ ലഹരിപാര്‍ട്ടി കേസില്‍ ആര്യന്‍ഖാനെയും രണ്ട് സുഹൃത്തുക്കളെയും എന്‍സിബി അറസ്റ്റ് ചെയ്യുന്നത്. മുംബൈ തീരത്ത് ആഡംബര കപ്പലില്‍ ലഹരിപാര്‍ട്ടി നടത്തിയതില്‍ ആര്യനും ഉള്‍പ്പെട്ടിട്ടുണ്ടെന്ന് ചൂണ്ടിക്കാട്ടിയായിരുന്നു അറസ്റ്റ്. അര്‍ബാസ് മര്‍ച്ചന്റ്, മോഡല്‍ മുന്‍മുന്‍ ധമേച എന്നിവരാണ് ആര്യനൊപ്പം പിടിയിലായത്.
ആര്യനില്‍ നിന്ന് നിന്ന് ലഹരിമരുന്ന് പിടിച്ചെടുത്തിട്ടില്ലെന്നും ലഹരി ഉപയോഗിച്ചിട്ടില്ലെന്നും ആര്യന്റെ അഭിഭാഷകനായ മുന്‍ അറ്റോര്‍ണി ജനറല്‍ മുകുള്‍ റോഹ്‌ത്തഗി കോടതിയില്‍ വാദിച്ചിരുന്നു. അതിനാല്‍ അറസ്റ്റിന് നിയമ സാധുതയില്ലെന്നും അപ്രസക്തമായ ചില വാട്സാപ്പ് ചാറ്റുകളുടെ പേരിലാണ് ആര്യനെതിരായ കേസെന്നും അദ്ദേഹം കോടതിയെ അറിയിച്ചു. ലഹരിമരുന്ന് വിതരണക്കാരുമായി ആര്യന് ബന്ധമുണ്ടെന്നും അറസ്റ്റ് നിയമപ്രകാരമാണെന്നും എന്‍.സി.ബി കോടതിയില്‍ പറഞ്ഞിരുന്നു. ആഡംബരക്കപ്പലിലെ എന്‍സിബി റെയിഡില്‍ വ്യാപക ക്രമക്കേടുകള്‍ നടന്നതായി അറസ്റ്റിന് പിന്നാലെ ആരോപണങ്ങള്‍ ഉയര്‍ന്നിരുന്നു. അന്വേഷണ സംഘം റെയിഡിന്റെ വീഡിയോ പകര്‍ത്തിയിരുന്നില്ല. വിവാദങ്ങള്‍ ഉയര്‍ന്നതോടെ അന്വേഷണം എന്‍സിബിയുടെ പ്രത്യേക സംഘം ഏറ്റെടുത്തിരുന്നു.
