നെടുമങ്ങാട്: കഞ്ചാവ് കച്ചവടം തടയുകയും വിവരം പൊലീസില്‍ അറിയിക്കുകയും ചെയ്ത യുവാവിനെ കൊലപ്പെടുത്താന്‍ ശ്രമിച്ച കേസില്‍ രണ്ടുപേര്‍ അറസ്റ്റില്‍.
കരുപ്പൂര് മേക്കുംകരവീട്ടില്‍ ആര്‍. രാഹുല്‍രാജ് (21), വാണ്ട കുന്നുംമുകള്‍ ഹൗസില്‍ എസ്. ശ്രീജിത്ത് (23) എന്നിവരെയാണ് നെടുമങ്ങാട് പോലീസ് അറസ്റ്റ് ചെയ്തത്. കരുപ്പൂര് മൂത്താംകോണം പുളിമൂട്ടില്‍വീട്ടില്‍ ആര്‍. രാഹുല്‍രാജിനെ (28) മര്‍ദിച്ച്‌ കൊലപ്പെടുത്താന്‍ ശ്രമിച്ച സംഭവത്തിലാണ് ഇരുവരും പിടിയിലായത്. മൂത്താംകോണത്തും പരിസരപ്രദേശങ്ങളിലും കഞ്ചാവ് കച്ചവടം നടത്തിയിരുന്ന പ്രതികളെ രാഹുല്‍രാജ് വിലക്കി.
ഇതിലുള്ള പക കാരണം കഴിഞ്ഞദിവസം സുഹൃത്തുമൊത്ത് ബൈക്കില്‍ വരുകയായിരുന്ന രാഹുല്‍രാജിനെ മര്‍ദിക്കുകയും ഇരുമ്പുവടികൊണ്ട് തലക്കടിച്ച്‌ കൊലപ്പെടുത്താന്‍ ശ്രമിക്കുകയുമായിരുന്നു. ബൈക്കില്‍ ഒപ്പമുണ്ടായിരുന്ന സുഹൃത്ത് അനീഷിനെയും പ്രതികള്‍ മര്‍ദിച്ചു. അറസ്റ്റ് ചെയ്ത പ്രതികളെ നെടുമങ്ങാട് കോടതി റിമാന്‍ഡ് ചെയ്തു.
