ഇരിങ്ങാലക്കുട : യുവാവിനെയും സുഹൃത്തിനെയും വധിക്കാന് ശ്രമിച്ച കേസില് മധ്യവയസ്കന് തടവ് ശിക്ഷ വിധിച്ച് കോടതി. മുരിയാട് വെള്ളിലാംകുന്ന് കറപ്പം വീട്ടില് മജീദിനെ (55) ആണ് ഇരിങ്ങാലക്കുട പ്രിന്സിപ്പല് അസി. സെഷന്സ് ജഡ്ജ് ടി. സഞ്ജു ശിക്ഷിച്ചത്. ഏഴ് വര്ഷം കഠിന തടവും 35,000 രൂപ പിഴയും ആണ് ശിക്ഷിച്ചത്. 2014 ഏപ്രില് 17-ന് രാത്രി 9.30-ന് ആണ് കേസിനാസ്പദമായ സംഭവം. മുരിയാട് വെള്ളിലാംകുന്ന് പഞ്ചായത്ത് കിണറിനടുത്താണ് ആക്രമണം നടന്നത്. വെള്ളിലാംകുന്ന് തോട്ടാപ്പിള്ളി സുബ്രെന്റെ മകന് ബിജു (40), സുഹൃത്ത് പള്ളിപ്പാമഠത്തില് കൃഷ്ണന്കുട്ടിയുടെ മകന് മണികണ്ഠന് (31) എന്നിവരെയാണ് മജീദ് ആക്രമിച്ചത്.
പിഴ അടക്കാത്ത പക്ഷം ഒന്നര വര്ഷം കൂടി തടവ് അനുഭവിക്കണമെന്നും കോടതി ഉത്തരവില് പറയുന്നു. ഇരിങ്ങാലക്കുട പോലീസ് അഡീഷണല് സബ് ഇന്സ്പെക്ടറായിരുന്ന എം. മുഹമ്മദ് സഹീര് രജിസ്റ്റര് ചെയ്ത കേസ് ഇരിങ്ങാലക്കുട ഇന്സ്പെകടര് ആര്. മധു ആണ് കുറ്റപത്രം സമര്പ്പിച്ചത്. കേസില് അഡീഷണല് പബ്ലിക് പ്രോസിക്യൂട്ടര് പി.ജെ. ജോബി, അഡ്വ. ജിഷ ജോബി എന്നിവര് ഹാജരായി.
