ഡല്ഹി : യുക്രൈനില് കുടുങ്ങിയ മറ്റ് രാജ്യങ്ങളില് നിന്നുള്ളവരെയും ഇന്ത്യ സഹായിക്കുമെന്ന് ഉന്നതതല യോഗത്തില് പ്രധാന മന്ത്രി നരേന്ദ്രമോദി. ഓപ്പറേഷന് ഗംഗ ഏകോപിപ്പിക്കാന് ചുമതപ്പെടുത്തിയ നാല് കേന്ദ്രമന്ത്രിമാരും യോഗത്തില് പങ്കെടുത്തു. ആളുകള് നേരിട്ട് അതിര്ത്തിയില് എത്തരുതെന്ന് കേന്ദ്രവിദേശകാര്യമന്ത്രാലയം അറിയിച്ചു. ആറ് വിമാനങ്ങളിലായി 132 മലയാളികളടക്കം 1396 പേരാണ് ഇതിനോടകം ഇന്ത്യയില് മടങ്ങിയെത്തിയത്.
24 മണിക്കൂറിനിടെ മൂന്ന് ഉന്നത തലയോഗങ്ങളാണ് പ്രധാന മന്ത്രിയുടെ അധ്യക്ഷതയില് ചേര്ന്നത്. യുക്രൈനിലേക്കുള്ള ദുരിതാശ്വാസ സാമഗ്രികള് നാളെ അയക്കുമെന്നും യുക്രൈനില് കുടുങ്ങിയ അയല്രാജ്യങ്ങളിലും വികസ്വര രാജ്യങ്ങളില് നിന്നുമുള്ളവരെ ഇന്ത്യ സഹായിക്കുമെന്നും പ്രധാനമന്ത്രി യോഗത്തില് അറിയിച്ചു. യുക്രൈന്റെ അയല് രാജ്യങ്ങളില് പോകാന് ചുമതലപ്പെടുത്തിയ ജ്യോതിരാദിത്യ സിന്ധ്യ, ഹര്ദീപ് സിങ് പുരി, വി കെ സിംങ്, കിരണ് റിജിജു എന്നിവര് യോഗത്തില് പങ്കെടുത്തു. പ്രാദേശിക സര്ക്കാരുകളുമായി സംസാരിക്കുന്നതിനും രക്ഷാപ്രവര്ത്തനം ഏകോപിപ്പിക്കുന്നതിനും വേണ്ടിയാണ് മന്ത്രിമാരെ ചുമതലപ്പെടുത്തിയത്.
