കോട്ടയം : കല്യാണം മുടക്കിയെന്നാരോപിച്ച് അയല്വാസിയായ യുവതിയെ കൊലപ്പെടുത്താന് ശ്രമിച്ച യുവാവ് അറസ്റ്റില്. വാകത്താനം പന്ത്രണ്ടാംകുഴി ഭാഗത്ത് പുതുപറമ്പില് വിട്ടില് ശ്യാം പി.ശശീന്ദ്രനെ (34)യാണ് വാകത്താനം പോലീസ് ഇന്സ്പെക്ടര് റെനീഷ് ഇല്ലിക്കല് അറസ്റ്റ് ചെയ്തത്. ജോലി കഴിഞ്ഞു വന്ന യുവതിയെ നടുറോഡില് മരക്കമ്പുകൊണ്ടടിച്ചു കൊലപ്പെടുത്താന് ശ്രിമിക്കുക ആയിരുന്നു.
തന്റെ കല്യാണം മുടക്കുന്നത് അയല്വാസികളായ ഇവരാണെന്ന് ആരോപിച്ചായിരുന്നു ആക്രമണം. കഴിഞ്ഞ ദിവസം രാവിലെ വീട്ടില്നിന്ന് ജോലിക്കുപോയ യുവതിയെ പന്ത്രണ്ടാംകുഴി ഭാഗത്തുവെച്ച് യുവാവ് പതിയിരുന്ന് ആക്രമിക്കുകയായിരുന്നു. ബഹളംകേട്ട് മകളെ രക്ഷിക്കാനായി ഓടിയെത്തിയ യുവതിയുടെ അച്ഛനെയും യുവാവ് ആക്രമിച്ചു. പരിക്കേറ്റ ഇരുവരെയും കോട്ടയം മെഡിക്കല് കോളേജ് ആശുപത്രിയില് പ്രവേശിപ്പിച്ചു. എസ്ഐ. തോമസ് ജോസഫ്, എഎസ്ഐ. സുനില്കുമാര് കെ.എസ്, സി.പി.ഒ.മാരായ ലാല്ചന്ദ്രന്, ഫ്രാന്സിസ്, അഭിലാഷ് എന്നിവരടങ്ങിയ സംഘമാണ് ഇയാളെ അറസ്റ്റ് ചെയ്തത്. കോടതിയില് ഹാജരാക്കിയ പ്രതിയെ 14 ദിവസത്തേക്ക് റിമാന്ഡ് ചെയ്തു.
